"Tencent"dən yeni AI addımı: "WeChat"də "Xiaowei" köməkçisi sınaqdan keçirilir

"WeChat" platformasının sahibi olan "Tencent" yeni süni intellekt köməkçisi "Xiaowei"ni məhdud istifadəçi qrupu arasında sınaqdan keçirməyə başlayıb.

Valyuta.az xəbər verir ki, şirkət "Xiaowei"ni 2026-cı ilin üçüncü rübündə bütün istifadəçilər üçün istifadəyə verməyi planlaşdırır.

"WeChat"in açıqlamasına görə, yeni AI köməkçisi istifadəçilərlə mətn və səs vasitəsilə qarşılıqlı əlaqə quraraq tətbiqin mini-proqram ekosistemi üzərindən müxtəlif tapşırıqları yerinə yetirə biləcək.

"Xiaowei" istifadəçilərin adından zəng başlatmaq, mesaj hazırlamaq, xidmətlərə keçid etmək və digər əməliyyatları həyata keçirmək üçün nəzərdə tutulub. Bununla da istifadəçilər müxtəlif menyular arasında axtarış aparmadan istədikləri funksiyalara birbaşa çıxış əldə edəcəklər.

Sistem əsasən "Weixin"in öz böyük dil modelindən istifadə edir. Bəzi sorğuların emalı zamanı isə "DeepSeek" texnologiyasından yararlanılır.

"Tencent" uzunmüddətli perspektivdə "WeChat"i səsli və ya yazılı göstərişlər vasitəsilə ödənişləri, xidmətləri və maliyyə əməliyyatlarını idarə edə bilən rəqəmsal köməkçiyə çevirməyi hədəfləyir.

Qeyd edək ki, investorlar bu təşəbbüsü müsbət qarşılayıb və AI agenti ilə bağlı gözləntilər fonunda "Tencent"in səhmləri yüksəliş göstərib.

Həmçinin "Xiaowei" şirkətin "WeChat"ə inteqrasiya etdiyi ilk süni intellekt həlli deyil. "Tencent" bu ilin əvvəlində istifadəçilərin kontakt kimi əlavə edib birbaşa mesajlaşa bildiyi "Yuanbao" adlı müstəqil çatbotunu təqdim etmişdi.

"Xiaowei" ənənəvi çatbotlardan fərqli olaraq istifadəçinin adından tətbiq daxilində konkret əməliyyatlar həyata keçirən AI agenti kimi fəaliyyət göstərəcək.

Bununla belə, istifadəçilərin bu cür köməkçilərə nə dərəcədə etibar edəcəyi və sistemin ödənişlər, şəxsi məlumatlar və digər həssas əməliyyatları təhlükəsiz şəkildə idarə edib-etməyəcəyi qarşıdakı aylarda aparılacaq sınaqlar zamanı aydınlaşacaq. 

Rəfiqə Abdin