İnvestisiya üçün yeni, yoxsa köhnə tikilidən ev almaq sərfəlidir?

Daşınmaz əmlak bazarı Azərbaycanda ən çox diqqət çəkən sahələrdən birinə çevrilib. Qiymətlərin dinamikası, alıcı davranışları və investisiya meyilləri bazarda mühüm dəyişikliklərə səbəb olub. Əmlaka yatırım etməyi düşünənlər üçün isə əsas məsələlərdən biri konkret seçimlə bağlıdır: investisiya üçün yeni tikili daha uyğundur, yoxsa köhnə tikili?

İqtisadçı Eldəniz Əmirov Valyuta.az-a bildirib ki, Azərbaycanda, xüsusilə paytaxt Bakıda və ətraf ərazilərdə daşınmaz əmlak bazarında qiymətlərin kəskin artmasının başlıca səbəbi əmlakın getdikcə əsas investisiya alətinə çevrilməsidir:

"Əmlaka investisiya yönlü tələbatın artması qiymətlərin yüksəlməsində başlıca amil rolunu oynayıb. Təbii ki daşınmaz əmlaka investisiya məqsədilə müraciət edilirsə, bu zaman yeni tikililər daha əlverişli hesab olunur.

Əgər investisiya üçün ayrılmış vəsait geniş həcmlidirsə, o zaman bu vəsaiti fərqli kateqoriyalı əmlaklar üzrə bölüşdürmək məqsədəuyğundur. Məsələn, 10 ədəd mənzil alınması planlaşdırılırsa, təxminən 3-4 mənzil köhnə tikililərdən, qalan 6-7 mənzil isə yeni tikililərdən seçilə bilər".

Mayya Hüseynova