"Helion" 465 milyon dollar investisiya cəlb edib - "Microsoft" üçün stansiya hazırlayır

ABŞ-ın termonüvə sintezi texnologiyaları üzrə fəaliyyət göstərən "Helion" şirkəti yeni maliyyələşdirmə raundunda 465 milyon dollar investisiya cəlb edib.

Valyuta.az xəbər verir ki, şirkətin investisiya raundundan sonra bazar dəyəri 15,5 milyard dollara yüksəlib.

"OpenAI" rəhbəri Sem Altmanın dəstəklədiyi "Helion" hazırda ilk elektrik stansiyası olan "Orion" layihəsinin tikintisini sürətlə davam etdirir.

Şirkət termonüvə enerjisini elektrik şəbəkəsinə qoşmaq üçün iddialı hədəflər müəyyən edib və "Microsoft" ilə bağlanmış müqavilənin şərtlərini yerinə yetirə biləcəyi təqdirdə, 2028-ci ildən enerji təchizatına başlamağı planlaşdırır.

Yeni G seriyalı investisiya raunduna "Thrive Capital" rəhbərlik edib. Maliyyələşdirmədə "Alta Park Capital", "Anti Fund", "BoxGroup", "Lux Capital", "Peak XV Partners" və Bill Ford kimi yeni investorlarla yanaşı, şirkətin mövcud investorları da iştirak ediblər.

Bunlar arasında "Lightspeed Venture Partners", "Mithril Capital", "SoftBank Vision Fund 2" və digər fondlar yer alır.

"Helion"un texnologiyası rəqiblərindən fərqli yanaşmaya əsaslanır.

Şirkət termonüvə reaksiyası nəticəsində yaranan enerjini ənənəvi buxar turbinləri vasitəsilə deyil, birbaşa maqnit sistemləri üzərindən elektrik enerjisinə çevirməyi hədəfləyir. Şirkət hesab edir ki, bu üsul elektrik stansiyalarının ümumi səmərəliliyini əhəmiyyətli dərəcədə artıracaq.

Bununla belə, bəzi mütəxəssislər texnologiyanın praktik tətbiqi ilə bağlı ehtiyatlı mövqe sərgiləyirlər.

Tənqidçilər qeyd edirlər ki, "Helion" elmi nəticələrini ekspert qiymətləndirməsindən keçən akademik jurnallarda məhdud şəkildə dərc edir. Şirkətin baş icraçı direktoru Devid Kirtli isə əsas diqqətin nəzəri müzakirələrdən çox real qurğuların yaradılmasına yönəldiyini bildirib.

Son aylarda termonüvə sintezi sektoru investorların xüsusi marağına səbəb olub. "Focused Energy", "Thea Energy", "Inertia Energy" və "Type One Energy" kimi şirkətlər də yüz milyonlarla dollar həcmində yeni investisiyalar cəlb etdiklərini açıqlayıblar.

Mütəxəssislərin fikrincə, termonüvə enerjisi gələcəkdə dəniz suyundan istifadə etməklə demək olar ki, məhdudiyyətsiz və fasiləsiz enerji istehsalına imkan yarada bilər.

Bu səbəbdən texnologiya həm süni intellekt sahəsində fəaliyyət göstərən şirkətlərin, həm də iri investorların diqqət mərkəzində qalmağa davam edir. Bununla yanaşı, kommersiya miqyaslı termonüvə elektrik stansiyalarının geniş istifadəyə verilməsi üçün hələ bir neçə il vaxt tələb olunduğu vurğulanır.

Tənzilə Ağabalayeva