Enerji böhranı: Avropa Komissiyası vətəndaşları evdən işləməyə çağırır

Avropa Komissiyası vətəndaşları evdən işləməyə, avtomobillərdən daha az istifadə etməyə və təyyarə səfərlərini azaltmağa çağırıb. Eyni zamanda Avropa İttifaqı ölkələrindən enerji keçidini sürətləndirmək və bərpa olunan enerji mənbələrini təcili şəkildə inkişaf etdirmək tələb olunub. 

Valyuta.az xəbər verir ki, bu barədə “Politico” məlumat yayıb.

Koronavirus pandemiyasının ilk günlərini xatırladan çıxışında Aİ-nin enerji məsələləri üzrə komissarı Dan Yorqensen Avropanın çox ciddi vəziyyət lə üzləşdiyini və bunun yaxın zamanda bitəcəyinə dair heç bir əlamət olmadığını bildirib.

"Sabah sülh əldə olunsa belə, biz yaxın gələcəkdə normal həyata qayıtmayacağıq", deyə o, Aİ-nin 27 üzv ölkəsinin enerji nazirlərinin fövqəladə toplantısından sonra bildirib.

Yorqensen vurğulayıb ki, xüsusilə dizel və aviasiya yanacağı olmaqla neftə qənaət etmək üçün mümkün olan hər addım Avropanın vəziyyətini yaxşılaşdıra bilər.

O, ölkələri Beynəlxalq Enerji Agentliyinin tövsiyələrinə əməl etməyə çağırıb. Bu tövsiyələrə evdən işləmək imkanlarının genişləndirilməsi, magistral yollarda sürət həddinin 10 km/saat azaldılması, ictimai nəqliyyatın təşviqi, şəxsi avtomobillər üçün növbəli hərəkət rejimi, karşerinqin genişləndirilməsi və ekoloji sürücülük praktikalarının tətbiqi daxildir.

Uzunmüddətli perspektivdə isə o, Aİ ölkələrini bərpa olunan enerji layihələrinin sürətləndirilməsinə çağıraraq bildirib: “Bu, nəhayət vəziyyəti dəyişdirməli və bizi həqiqi enerji müstəqilliyinə aparmalı bir məqam olmalıdır”.

Yorqensenin açıqlamaları ABŞ və İsrailin İrana qarşı hücumlarından sonra Yaxın Şərqdə yaranan gərginlik fonunda verilib. Bildirilir ki, bu vəziyyət qlobal enerji bazarında ciddi narahatlıq yaradıb və 1970-ci illərin neft böhranını belə keçə biləcək miqyasda risklər formalaşdırır.

Məlumata görə, hücumlardan sonra neft və qaz qiymətləri 70 faiz artıb. Qlobal xam neft və mayeləşdirilmiş təbii qaz tədarükünün təxminən beşdə biri Fars körfəzindəki məhdudiyyətlər səbəbindən risk altına düşüb.

Paşa Məmmədli