Ən pis ay: Bitkoin 2022-ci ildən bəri ən böyük enişə doğru gedir

Noyabr ayında Bitkoin öz dəyərinin təxminən 23%-ni itirib ki, bu da 2022-ci ilin iyunundan bəri ən böyük aylıq enişdir. 

Valyuta.az xəbər verir ki, bu barədə "Bloomberg" yazıb.

Qeyd olunur ki, cümə günü Bitkoin 6,4% enərək 81 629 dollara düşüb, daha sonra isə kriptovalyuta müəyyən qədər bərpa olunub. London vaxtı ilə səhər 7:42-də o, 84 166 dollardan ticarət olunurdu. Eyni zamanda ikinci ən populyar kriptovalyuta olan Ether 7,6% enərək 2700 dolların altına düşüb.

Donald Tramp və digər bir sıra institutların kriptoindustriyaya olan rəğbətinə baxmayaraq, bitkoin oktyabrın əvvəlində qeydə alınan rekord maksimumundan 30%-dən çox dəyər itirib.

Eniş 10 oktyabrda fyuçers mövqelərinin genişmiqyaslı likvidasiyasından sonra davam edib. Bu proses bütün kriptovalyutaların birgə bazar dəyərindən təxminən 1,5 trilyon dolların silinməsinə səbəb olub. Üstəlik, yalnız son sutkada əlavə 2 milyard dollar kredit mövqeyi də likvidasiya edilib.

"Bazarda əhval-ruhiyyə son dərəcə pisdir. Görünür, bazarda məcburi satıcı peyda olub və bunun nə qədər ciddi olduğu hələ ki, aydın deyil", deyə Avstraliyanın "Apollo Crypto" hedc-fondunun portfel meneceri Pratik Kala bildirib.

6 oktyabrda ən populyar kriptovalyuta olan Bitkoin 126 000 dollardan yüksək rekord səviyyəyə çatıb. Lakin artıq 10 oktyabrda ABŞ prezidenti Donald Trampın Çin mallarına 100%-lik əlavə rüsum tətbiqi və proqram təminatının ixracına nəzarətin gücləndirilməsi barədə bəyanatı səbəbilə kriptovalyuta bazarı ən kəskin çökmələrdən birini yaşayıb.

5 noyabrda Bitkoin ilk dəfə iyundan bəri 100 000 dollar səviyyəsindən aşağı düşüb ki, bu da bir ay əvvəlki rekorddan 20%-dən çox eniş deməkdir.

18 noyabrda isə Bitkoin yeddi ay ərzində ilk dəfə 90 000 dolların altına enib. Bu, investorların maliyyə bazarlarında riskli əməliyyatlara marağının tükəndiyini göstərir.

Paşa Məmmədli