"Əhvalın yoxdursa, işə gəlmə" - Rəhbər işçilərinə "bədbəxtlik məzuniyyəti" verdi

Asiya ölkələri adətən uzun iş saatları, yüksək iş yükü və gərgin əmək mədəniyyəti ilə tanınır. Lakin Çində fəaliyyət göstərən bir şirkət bu ənənədən fərqli addım ataraq işçilərinin psixoloji rifahını ön plana çıxarıb.

Çinin tanınmış pərakəndə satış şəbəkələrindən biri olan "Pang Dong Lai" işçilərinin iş-həyat balansını yaxşılaşdırmaq məqsədilə yeni məzuniyyət növü tətbiq edib.

Valyuta.az xəbər verir ki, şirkətin təsisçisi və İdarə Heyətinin sədri Yu Donqlay (Yu Donglai) əməkdaşlara ildə 10 gün ödənişli "bədbəxtlik məzuniyyəti" verib.

Onun sözlərinə görə, işçilər özlərini psixoloji cəhətdən yaxşı hiss etmədikləri günlərdə heç bir əsaslandırma vermədən bu məzuniyyətdən istifadə edə bilərlər.

"İstəyirəm ki, hər bir əməkdaş azad olsun. Hər kəsin özünü yaxşı hiss etmədiyi günlər olur. Əgər xoşbəxt deyilsinizsə, işə gəlməyin", - deyə Yu bildirib.

O vurğulayıb ki, rəhbərlər işçilərin bu məzuniyyət istəyini rədd edə bilməzlər. Onun sözlərinə görə, belə hallarda məzuniyyətin təsdiqlənməməsi şirkət qaydalarının pozulması hesab olunacaq.

Yeni təşəbbüs Çin sosial şəbəkələrində geniş müzakirələrə səbəb olub. Bir çox istifadəçi bu addımı müsbət qiymətləndirərək belə iş mühitinin digər şirkətlərdə də tətbiq edilməsinin vacibliyini qeyd edib.

Araşdırmalara görə, Çində işçilərin 65 faizdən çoxu iş yerində yorğunluq və narazılıq hiss etdiyini bildirir. Bunun əsas səbəbləri kimi aşağı əməkhaqqı, mürəkkəb iş münasibətləri və uzun iş saatları göstərilir.

Yu Donqlay daha əvvəl də uzun iş saatlarını tənqid edərək işçilərin mütəmadi şəkildə əlavə saatlarla işlədilməsini etik olmayan yanaşma adlandırıb.

Şirkətdə əməkdaşlar gündə 7 saat işləyir, həftəsonları istirahət edirlər, ildə 30-40 gün məzuniyyət, həmçinin Çin Yeni ili dövründə 5 günlük əlavə istirahət hüququna malik ola biliblər.

Sərvanə Rəmixanova