"PayPal" ikinci rübdə gözləntiləri üstələdi, illik mənfəət proqnozunu artırdı

"PayPal" 2026-cı ilin ikinci rübü üzrə açıqladığı maliyyə nəticələri ilə bazar gözləntilərini üstələyib və tam maliyyə ili üzrə mənfəət proqnozunu artırıb.

Şirkətin açıqlamasına görə, ikinci rübdə hər səhmə düşən mənfəət (EPS) 1,38 ABŞ dolları təşkil edib. Bu göstərici analitiklərin 1,28 dollarlıq proqnozundan 0,10 dollar yüksək olub.

Rüb ərzində şirkətin gəlirləri valyuta məzənnələrinin təsiri nəzərə alınmadan illik müqayisədə 3 faiz artaraq 8,68 milyard ABŞ dollarına çatıb. Beləliklə, gəlirlər bazarın 8,47 milyard dollarlıq konsensus proqnozunu da üstələyib.

Müsbət maliyyə nəticələrinin fonunda "PayPal" 2026-cı maliyyə ili üzrə proqnozunu da yeniləyib.

Şirkət indi hər səhmə düşən mənfəətin 5,38 ABŞ dolları olacağını gözləyir. Bu göstərici həm əvvəlki proqnozdan, həm də analitiklərin 5,31 dollarlıq gözləntisindən yüksəkdir.

Bununla yanaşı, şirkət üçüncü rübdə düzəliş edilmiş hər səhmə düşən mənfəətin ötən ilin eyni dövrü ilə müqayisədə aşağı təkrəqəmli faiz həddində azalacağını proqnozlaşdırır. Ötən ilin üçüncü rübündə bu göstərici 1,34 ABŞ dolları olmuşdu.

"PayPal"ın baş icraçı direktoru Enrike Lores bildirib ki, şirkət transformasiya strategiyasının həyata keçirilməsində mühüm irəliləyiş əldə edib.

"Bu rübdə əldə etdiyimiz nəticələr bizi ruhlandırır. Biz transformasiya planımızı daha da təkmilləşdirdik və üç əsas biznes istiqamətimiz üzrə inkişaf strategiyalarının icrasını sürətləndirdik. İcra göstəricilərimizin güclü olması və biznesimizin inkişaf perspektivinə inamımız tam il üzrə qeyri-GAAP mənfəət proqnozumuzu artırmağa imkan verdi. Uzunmüddətli, dayanıqlı və gəlirli artımı təmin etmək üçün prioritetlərimizi ardıcıl şəkildə həyata keçirməyə davam edirik", – deyə o vurğulayıb.

Şirkətin əməliyyat göstəriciləri də müsbət dinamika nümayiş etdirib. İkinci rübdə tranzaksiya marjası üzrə gəlir 1 faiz artaraq 3,9 milyard ABŞ dollarına çatıb. Müştəri balansları üzrə faiz gəlirləri nəzərə alınmadıqda isə bu göstərici 3 faiz artaraq 3,6 milyard ABŞ dolları olub.

Eyni zamanda, düzəliş edilmiş əməliyyat mənfəəti 8 faiz azalaraq 1,5 milyard ABŞ dollarına düşüb. Düzəliş edilmiş əməliyyat marjası isə 248 baza bəndi azalaraq 17,4 faiz təşkil edib.

Rüb ərzində ümumi ödəniş həcmi 10 faiz artaraq 486,4 milyard ABŞ dollarına yüksəlib. Valyuta məzənnələrinin təsiri çıxıldıqda artım 9 faiz olub. Ödəniş əməliyyatlarının sayı isə 8 faiz artaraq 6,8 milyarda çatıb.

Son 12 ay üzrə hər aktiv hesab üçün orta əməliyyat sayı 60-a yüksəlib ki, bu da illik müqayisədə 3 faiz artım deməkdir. Ödəniş xidməti provayderləri (PSP) üzrə əməliyyatlar nəzərə alınmadıqda isə artım 7 faiz təşkil edib.

Şirkətin aktiv hesablarının sayı illik müqayisədə cüzi artaraq 439 milyona çatıb. Bununla belə, əvvəlki rüblə müqayisədə aktiv hesabların sayı 0,2 milyon və ya 0,04 faiz azalıb. Bu göstərici "PayPal"ın istifadəçi bazasının ümumilikdə sabit qaldığını göstərir.

Tənzilə Ağabalayeva