Süni intellektdən məsləhət aldı və 100 milyon gəliri olan şirkət qurdu

Braziliyada fəaliyyət göstərən süni intellekt təhsili şirkəti Viver de IA biznesinin demək olar ki, bütün əməliyyatlarını "Lovable" adlı süni intellekt platforması üzərində quraraq ölkənin ən sürətlə böyüyən şirkətlərindən birinə çevrilib.

Şirkətin təsisçisi Rafael Milagre olan “Viver de IA” hazırda 1 200-dən çox müştəriyə xidmət göstərir. Şirkət yüzlərlə təlim kursu, 50-dən çox süni intellekt həlli və davamlı mentorluq proqramları təqdim edir.

54 nəfərlik komanda təxminən bir ildir ki, "Lovable" platformasından hər gün, demək olar ki, fasiləsiz istifadə edir. Platforma yalnız tətbiqin hazırlanması üçün deyil, həm də müştəri münasibətlərinin idarə olunması (CRM), maliyyə əməliyyatları, şirkətin veb-saytı və satış proseslərinin idarə edilməsində əsas alətə çevrilib.

Şirkət hətta Google Analytics xidmətini də özünün "Lovable" üzərində hazırladığı fərdi analitika paneli ilə əvəz edib.

Bu yanaşmanın nəticəsi olaraq “Viver de IA” 2026-cı ildə təxminən 100 milyon Braziliya realı (təxminən 20 milyon ABŞ dolları) gəlir əldə etməyi hədəfləyir. Şirkətin məlumatına görə, bu məbləğin 36,6 milyon realı artıq cari il üzrə təmin edilib.

Şirkət bu uğuru süni intellekt alətlərinin biznes proseslərinə geniş şəkildə inteqrasiya edilməsi ilə əlaqələndirir. "Viver de IA" hazırda Braziliyada ən sürətlə inkişaf edən şirkətlərdən biri hesab olunur və fəaliyyətinin böyük hissəsini "Lovable" platforması üzərində qurub.

Şəbnəm İbrahimxəlilova