HSBC Sinqapurda qlobal süni intellekt mərkəzi yaradacaq

HSBC 2026-cı ilin ikinci yarısında Sinqapurda qlobal süni intellekt üzrə mükəmməllik mərkəzi yaradacaq.

Valyuta.Az xəbər verir ki, yeni bölmə müştəri sərvətinin idarə olunması ilə bağlı dialoqların təkmilləşdirilməsi, xəzinədarlıq əməliyyatları üçün agent əsaslı alətlərin tətbiqi və süni intellekt dəstəyi ilə rəqəmsal ödəniş həllərinin hazırlanması istiqamətində fəaliyyət göstərəcək.

Bankın məlumatına görə, mərkəz üçün 100-dən çox süni intellekt mütəxəssisi işə götürüləcək.

Onlar HSBC-nin baş süni intellekt direktoru Devid Rays (David Rice) və sərvət idarəçiliyi, qlobal ödənişlər və digər istiqamətlər üzrə komandalarla əməkdaşlıq edəcəklər.

Mərkəzdə təbii dil işlənməsi, məlumat elmi, süni intellektin idarə olunması və insan mərkəzli dizayn sahələrində mütəxəssislər hazırlanacaq.

Bankın məlumatına görə, bu məqsədlə Sinqapurun təhsil müəssisələri və dövlət qurumları ilə əməkdaşlıq planlaşdırılır.

HSBC Qrupunun baş icraçı direktoru Corc Elhederi (Georges Elhedery) bildirib:

"Sinqapurda yaradılacaq Süni İntellekt üzrə Mükəmməllik Mərkəzi qlobal süni intellekt strategiyamızın həyata keçirilməsinə töhfə verəcək. Bu mərkəz əməkdaşlarımızın hər bir müştəri üçün fərdiləşdirilmiş xidmət təqdim etməsi, bunu təhlükəsiz şəkildə və real vaxt rejimində geniş miqyasda həyata keçirməsi üçün imkanları gücləndirəcək. Eyni zamanda, insan qərarverməsi və məsuliyyət bu prosesin əsasını təşkil edəcək."

Ötən ay HSBC “Google Cloud” ilə çoxillik əməkdaşlıq müqaviləsi imzalayıb. Bank qlobal fəaliyyətində süni intellekt alətlərinin tətbiqini sürətləndirməyi planlaşdırır.

Əməkdaşlıq çərçivəsində HSBC “Google Cloud” və “Google DeepMind” mühəndisləri ilə birlikdə “Gemini” modelləri və “Gemini Enterprise Agent Platform” kimi agent əsaslı süni intellekt texnologiyalarına söykənən həllər üzərində işləyəcək.

Bankın məlumatına görə, növbəti iki il ərzində 200-dən çox süni intellekt tətbiqinin hazırlanması planlaşdırılır.

Bu ilin martında Bloomberg xəbər vermişdi ki, HSBC süni intellektə əsaslanan transformasiya proqramı çərçivəsində işçi ixtisarlarını nəzərdən keçirir. Bu addım əsasən xidmət mərkəzlərində müştərilərlə birbaşa işləməyən vəzifələri əhatə edəcək.

Bu dəyişikliklərin bankın ümumi işçi qüvvəsinin təxminən 10 faizini təşkil edən 20 minə yaxın əməkdaşa təsir göstərə biləcəyi bildirilir.