UNEC-dən tələbələrə startap imkanı: qaliblərə maliyyə dəstəyi veriləcək

Azərbaycan Dövlət İqtisad Universiteti (UNEC) II Tələbə Startap Müsabiqəsinin elan olunduğunu açıqlayıb. 

Valyuta.Az-ın verdiyi xəbərə görə, müsabiqə tələbələrin innovativ ideyalarının inkişafına və tətbiqyönlü layihələrin reallaşdırılmasına dəstək məqsədi daşıyır.

Təşəbbüs çərçivəsində texnoloji, sosial, ekoloji və iqtisadi problemlərin həllinə yönəlmiş layihələrin hazırlanması və inkişafı təşviq olunur.

Müsabiqədə UNEC-in bakalavriat və magistratura səviyyələrində təhsil alan tələbələri iştirak edə bilərlər. Komandalar 2–5 nəfərdən ibarət olmalı, onlardan biri komanda rəhbəri təyin edilməlidir. Hər iştirakçı yalnız bir layihədə təmsil oluna bilər. Qeyd olunur ki, universitetin əməkdaşları və ya məzunları komandalara mentor kimi qoşula bilərlər.

Təşkilatçıların məlumatına görə, təqdim edilən layihələr innovativ və tətbiqyönlü olmalı, real bazar və ya sosial problemlərin həllinə yönəlməlidir. Layihələrin icra müddəti maksimum 12 ay müəyyən edilib. Digər müsabiqələr çərçivəsində maliyyələşdirilmiş və ya eyni vaxtda başqa müsabiqələrə təqdim edilmiş layihələr qəbul olunmayacaq.

İştirak üçün elektron ərizə, tələbə bileti və şəxsiyyət vəsiqəsinin surəti, komanda üzvləri barədə məlumat, layihə təklifi (ideya, məqsəd, bazar potensialı və büdcə), həmçinin icra planı təqdim edilməlidir.

Layihələr ideyanın yeniliyi və aktuallığı, kommersiyalaşdırılma potensialı, komandanın bacarıqları, sosial və iqtisadi təsiri, eləcə də təqdimat mərhələsinin keyfiyyəti əsasında qiymətləndiriləcək.

Qalib seçilən komandalar UNEC ilə müqavilə bağlayacaq və ayrılan maliyyə vəsaiti birbaşa layihələrin icrasına yönəldiləcək. Eyni zamanda komandalar ayrılmış vəsaitdən istifadə ilə bağlı mütəmadi hesabat təqdim etməli olacaqlar.

Layihələrin qəbulu üçün son tarix 20 sentyabr 2026-cı il müəyyən edilib. Müraciətlər elektron poçt vasitəsilə qəbul olunur.