"Multiverse Computing" şirkəti 500 milyon avro investisiya cəlb etməyi hədəfləyir

İspaniyanın Donostiya şəhərində yerləşən və iri süni intellekt modellərinin hesablama tələblərini azaltmaq üçün texnologiyalar hazırlayan "Multiverse Computing" şirkəti 2 milyard avro post-investisiya dəyərləndirməsi ilə 500 milyon avroluq C seriyası investisiya raundu hədəflədiyini açıqlayıb.

Hazırda davam edən investisiya raundu İspaniyanın özəl texnologiya sektorunda indiyədək həyata keçirilmiş ən böyük maliyyələşdirmələrdən biri ola bilər.

Raunda ABŞ-ın "Forgepoint Capital", Böyük Britaniyanın "Bullhound Capital" və Fransanın "BNP Paribas" bankının iqlim yönümlü "Solar Impulse Venture Fund" (SIVF) fondu birgə rəhbərlik edir.

İnvestisiya raundunda Avropa İnnovasiya Şurasının (EIC) Fondu, İspaniyanın dövlət investisiya qurumu "SETT", Qətər İnkişaf Bankı və Kanada Milli Bankının korporativ vençur bölməsi "NAVentures" öhdəlik götürüb.

Bundan əlavə, "Santander Alternative Investments", "HP Inc." və "Orange Ventures" da maliyyələşdirməyə qoşulub. Raund son mərhələdə olsa da, əlavə strateji investorlar üçün açıq qalır.

Bu investisiya başa çatdıqdan sonra "Multiverse Computing"in indiyədək cəlb etdiyi ümumi maliyyə vəsaiti 700 milyon avronu ötəcək.

Bu isə şirkətin ötən il 215 milyon ABŞ dolları (təxminən 190 milyon avro) həcmində B seriyası investisiya cəlb etməsindən cəmi bir il sonraya təsadüf edir.

Tənzilə Ağabalayeva