"Referans"ın rəhbəri Hansıyar Babayevə müşavir təyin edildi - FOTO

"Referans Medical Group"un Müşahidə Şurası sədrinin strateji məsələlər üzrə müşaviri vəzifəsinə təyinat olub.

Valyuta.az xəbər verir ki, bu vəzifəyə Fəqan Həsənzadə təyin olunub.

O, ölkənin ən böyük xəstəxanalar və tibbi xidmət şəbəkəsi olan "Referans Medical Group"da Müşahidə Şurası sədrinin strateji məsələlər üzrə müşaviri və eyni zamanda Strategiya və Biznesin İnkişafı üzrə Direktor vəzifəsində fəaliyyətini davam etdirəcək.

O, əmək fəaliyyətinə Bakı Sağlamlıq Mərkəzində Keyfiyyətə Nəzarət Meneceri kimi başlayıb. Daha sonra həmin tibb müəssisəsində Xəstəxana Meneceri vəzifəsində çalışıb. Sonrakı illərdə TƏBİB-də Layihələrin İdarəedilməsi şöbəsinin müdiri, "Universal Hospital Baku"da Baş İcraçı Direktor (CEO) vəzifələrini icra edib.

Qeyd edək ki, Fəqan Həsənzadə Azərbaycan Dövlət İqtisad Universitetində (UNEC) iqtisadiyyat ixtisası üzrə bakalavr təhsili alıb. Daha sonra Üsküdar Universitetində Səhiyyənin idarə edilməsi ixtisası üzrə magistr dərəcəsinə yiyələnib. Hazırda isə İstinye Universitetində Səhiyyənin idarə edilməsi üzrə fəlsəfə doktoru (PhD) proqramı çərçivəsində təhsilini davam etdirir.

Xatırladaq ki, "Referans Medical Group"un təsisçisi və Müşahidə Şurasının sədri Hansıyar Babayevdir.

Sərvanə Rəmixanova