Yataq otağında əsası qoyulan startaplar

Bu gün trilyonlarla dollar dəyərində olan texnologiya nəhənglərinin əksəriyyəti dəbdəbəli ofislərdə deyil, kiçik yataq otaqlarında və tələbə yataqxanalarında fəaliyyətə başlayıb. Sadə şəraitdə yaranan ideyalar zamanla qlobal bizneslərə çevrilərək dünya iqtisadiyyatına istiqamət verib.

 Google

1998-ci ildə Larry Page və Sergey Brin tərəfindən yaradılan Google-un ilk axtarış sistemi Stenford Universitetində tələbə yataqxanasında hazırlanıb. İlk serverlərdən biri Larry Page-in otağında işləyirdi. Şirkət sonradan dünyanın ən böyük internet platformalarından birinə çevrildi. Hazırda Google-un sahibi olan Alphabet şirkətinin bazar dəyəri təxminən 2,5 trilyon ABŞ dollarıdır.

 Facebook

2004-cü ildə Mark Zuckerberg Harvard Universitetindəki yataqxana otağında Facebook-u yaradıb. Əvvəlcə yalnız universitet tələbələri üçün nəzərdə tutulan platforma sonradan milyardlarla istifadəçisi olan qlobal sosial şəbəkəyə çevrildi. Facebook-un sahibi Meta Platforms şirkətinin bazar dəyəri hazırda 2 trilyon ABŞ dollarını ötür.

 Microsoft

1975-ci ildə Bill Gates və Paul Allen tərəfindən qurulan Microsoft-un əsası Bill Gates-in evində və ilk iş mühitində qoyulub. Kiçik proqram təminatı layihəsi kimi başlayan şirkət bu gün dünyanın ən böyük texnologiya şirkətlərindən biridir. Microsoft-un bazar dəyəri 4 trilyon ABŞ dollarına yaxınlaşır.

 Dell

1984-cü ildə Michael Dell Texas Universitetindəki yataqxana otağında fərdi kompüterlər yığaraq satmağa başlayıb. Bu ideya sonradan Dell Technologies şirkətinin yaranmasına səbəb olub. Hazırda şirkətin bazar dəyəri 70 milyard ABŞ dollarından çoxdur.

 Snapchat

2011-ci ildə Evan Spiegel, Bobby Murphy və Reggie Brown tərəfindən Stenford Universitetində yaradılan Snapchat-ın ilk versiyası tələbə yataqxanasında hazırlanıb. Foto və videoların qısa müddət sonra silinməsi ideyası tətbiqin sürətlə populyarlaşmasına səbəb oldu. Hazırda şirkətin sahibi olan Snap Inc.-in bazar dəyəri təxminən 20 milyard ABŞ dollarıdır.

Şəbnəm İbrahimxəlilova