Nvidia və SK Group 500 milyard dollarlıq süni intellekt infrastruktur layihəsinə başlayır

ABŞ-ın texnologiya nəhəngi Nvidia ilə Cənubi Koreyanın SK Group şirkəti süni intellekt (AI) infrastrukturunun genişləndirilməsi üçün dəyəri 500 milyard ABŞ dollarından çox olan strateji tərəfdaşlıq elan edib.

Razılaşma çərçivəsində süni intellekt məlumat mərkəzlərinin yaradılması, yüksək məhsuldarlıqlı hesablama gücünün artırılması və yeni nəsil yaddaş texnologiyalarının inkişafı nəzərdə tutulur.

Layihənin əsas hissələrindən biri olaraq “SK Telecom”, Nvidia-nın “Vera Rubin” arxitekturası və “DSX AI Factory” platforması əsasında 2 giqavat gücündə süni intellekt fabriki inşa edəcək. İlk məlumat mərkəzinin 2027-ci ildə istismara verilməsi planlaşdırılır.

Bundan əlavə, ”Nvidia” və “SK hynix” yüksək ötürmə qabiliyyətinə malik HBM (High Bandwidth Memory) yaddaş texnologiyalarının hazırlanması və tədarükü üzrə uzunmüddətli əməkdaşlıq edəcəklər. Bu texnologiya böyük süni intellekt modellərinin öyrədilməsi və fiziki süni intellekt sistemlərinin işləməsi üçün əsas komponentlərdən biri hesab olunur.

Şirkətlər bildirirlər ki, tərəfdaşlığın məqsədi qlobal miqyasda süni intellekt infrastrukturunu gücləndirmək və gələcək nəsil süni intellekt tətbiqləri üçün daha yüksək hesablama imkanları yaratmaqdır.