"Fed"in sentyabr qorxusu: Bazarlar qərardan çox səs bölgüsünə diqqət yetirəcək

ABŞ Mərkəzi Bankı (Fed) sabah növbəti faiz qərarını açıqlayacaq. Bazar iştirakçıları faiz dərəcələrinin dəyişməyəcəyini gözləsələr də, analitiklər hesab edirlər ki, sentyabr iclası ilə bağlı əsas siqnal qərarın özündən deyil, səsvermənin nəticələrindən gələcək.

Valyuta.az xəbər verir ki, son aylarda dünyada artan geosiyasi gərginlik və enerji qiymətlərinin yüksəlməsi ABŞ-da inflyasiya risklərini artırıb. Bu səbəbdən "Fed"in ilin sonunadək ən azı bir dəfə faiz artımına gedə biləcəyi ehtimalları gündəmdə qalır. Tənzimləyicinin üzvlərinin son "dot-plot" proqnozlarında da əksəriyyət ilin sonuna qədər minimum bir faiz artımını dəstəklədiyini bildirib.

İki üzv faiz artımına səs verə bilər

Dünyanın aparıcı maliyyə xidmətləri şirkətlərindən biri olan Prudentialın ABŞ iqtisadiyyatı üzrə eksperti Blerina Uruçi hesab edir ki, Dallas "Fed" rəhbəri Lorie Logan və Klivlend "Fed" rəhbəri Beth Hammack sabahkı iclasda faizlərin 25 baza bəndi artırılmasının lehinə səs verə bilərlər.

"Şahin" mövqe güclənə bilər

Uruçinin fikrincə, faiz artımını dəstəkləyən üzvlərin sayı ikidən çox, xüsusilə də üçü keçərsə, bu, Fed daxilində sərt pul siyasətini dəstəkləyən ("şahin") mövqenin gücləndiyini göstərəcək.

Onun sözlərinə görə, belə bir nəticə sentyabr ayında faiz artımı ehtimalını əhəmiyyətli dərəcədə artıracaq.

Əsas ssenari dəyişmir

Bununla belə, ekspert sentyabrda və ya ilin qalan hissəsində faiz artımını hələ də əsas ssenari hesab etmir.

"Əsas proqnozumuz "Fed"in növbəti 12 ay ərzində faiz dərəcələrini dəyişməyəcəyidir", – deyə Uruçi bildirib.

Kevin Uorşın açıqlamaları da diqqət mərkəzindədir

Analitiklərin fikrincə, qərarla yanaşı, "Fed"in yeni sədri Kevin Uorşın mətbuat konfransında verəcəyi mesajlar da bazarlar üçün mühüm əhəmiyyət daşıyacaq.

ABŞ-ın ən böyük opsion birjalarından biri olan CME-nin qiymətləndirməsinə görə, bazarlar hazırda sabah keçiriləcək iclasda faizlərin sabit saxlanılması ehtimalını 66%, 25 baza bəndi artırılması ehtimalını isə 34% səviyyəsində qiymətləndirir.

Sərvanə Rəmixanova