“Bəzən işçilər bir-birini qısqana bilər, amma bu, qeyri-sağlam rəqabət sayılmır" - Ekspert

Bir tərəfdən, iş mühitində daxili rəqabət komandanı gücləndirə və işçiləri daha motivasiyalı edə bilər. Amma bəzilərinin fikrincə, bu rəqabət işçilər arasında paxıllıq, bir-birinə qarşı kin və nifrət yarada, iş mühitində çəkişmələrə səbəb ola bilər. 

Bəs iş mühitində sağlam daxili rəqabət necə yaradılmalıdır?

İnsan Resursları üzrə mütəxəsis İlkin Mirzəzadə Valyuta.az-a bildirir ki, ümumiyyətlə, iş yerində rəqabət vacibdir, lakin bu rəqabət mütləq şəkildə sağlam olmalıdır:

“Sağlam rəqabətin əsasında isə hər bir əməkdaşın yazılı, ölçülə bilən və dəqiq hədəflərə malik olması dayanır. Belə bir mühit formalaşdırılmamalıdır ki, məsələn, kim məhsulu daha çox satdısa, ona xüsusi mükafat verilsin. Əsas məqsəd şəffaf və ədalətli sistem qurmaqdır. İşçi bilməlidir ki, nə qədər satış etsə, bunun qarşılığında nə qədər gəlir əldə edə bilər. Təbii ki, satış yüksək olduqda qazanc da yüksək olacaq, az olduqda isə müvafiq olaraq azalacaq”.

“Ədalətli bölgü prinsipi ilə işləyən dəqiq rəqəmlər sistemi formalaşdırıldıqda, əməkdaşlar özləri sağlam rəqabətə maraq göstərirlər. Belə bir mühitdə kin, nifrət və şəxsi münasibətlər işə təsir etmir. Bəzi hallarda insanlar daxili olaraq narahatlıq, hətta qısqanclıq hiss edə bilərlər. Məsələn, “Niyə mən az satdım, digəri isə daha çox satdı?”. Bu isə insani duyğudur və qeyri-sağlam rəqabət sayılmır. Əsas məsələ düzgün performans sistemi qurmaq, aydın məqsədlər müəyyənləşdirmək və işçiləri şəffaf meyarlarla qiymətləndirməkdir. Bu yolla həm sağlam rəqabət mühiti yaradılır, həm də əməkdaşların daha səmərəli işləməsi təmin olunur” - deyə İ.Mirzəzadə qeyd edir.

Tənzilə Ağabalayeva