Sosial media nəhənglərinə qarşı tarixi iddia: Uşaqlar üçün "asılılıq maşını"

Dünyanın ən böyük sosial media şirkətləri uşaqlarda asılılıq yaradan mexanizmlər hazırladıqları və gənclərin psixi sağlamlığına mənfi təsir göstərdikləri iddiası ilə Los-Ancelesdə baxılan tarixi məhkəmə işində mühakimə olunurlar. 

Valyuta.az xəbər verir ki, iddiada "Meta" və “YouTube” irəli sürülən ittihamları rədd edir, lakin Mark Zakerberq və digər yüksək vəzifəli rəhbərlərin məhkəmədə ifadə verməsi gözlənilir.

Los-Anceles Ali Məhkəməsində keçirilən proses sosial media platformalarının xüsusilə uşaqlar üzərində yaratdığı psixoloji təsirləri diqqət mərkəzinə gətirir. İddiaçılar hesab edirlər ki, bu platformalar uşaqların və yeniyetmələrin uzun müddət ekrana bağlı qalması üçün məqsədli şəkildə “asılılıq mexanizmləri” dizayn ediblər.

Məhkəməni izləyən valideynlər adından çıxış edən Ellen Rum amerikalı və britaniyalı ailələrin ortaq ağrı yaşadığını bildirib. Onun sözlərinə görə, sosial medianın yaratdığı zərərlər nəticəsində çox sayda uşaq həyatını itirib və bu, qlobal miqyaslı problemdir.

İddianın mərkəzində uşaqlıq dövründə sosial media asılılığı səbəbindən ciddi psixi sağlamlıq problemləri yaşadığını bildirən Kaley G.M. dayanır. İddia tərəfi “Meta” və “YouTube”un asılılıq yaradan mexanizmləri bilərəkdən və məqsədli şəkildə hazırladığını vurğulayır. İddiaçıların vəkili sonsuz sürüşdürmə, avtomatik oynatma və “bəyənmə” düymələri kimi funksiyaların uşaqları ekrana bağlamaq məqsədi daşıdığını qeyd edib.

Məhkəməyə təqdim olunan sənədlər arasında “Meta”nın baş icraçı direktoru Mark Zakerberqin 2015-ci ildə yazdığı elektron məktub da yer alır. Həmin məktubda istifadəçilərin platformada keçirdiyi vaxtın 12 faiz artırılmasının hədəf kimi qoyulduğu bildirilir.

Şirkətlər isə ittihamları qəbul etmir. Müdafiə tərəfi iddiaçının yaşadığı psixi problemlərin sosial mediadan deyil, ailədaxili gərginlik və laqeydlikdən qaynaqlandığını irəli sürür. Bundan əlavə, şirkətlər yalnız platforma rolunu oynadıqlarını və üçüncü tərəf məzmununa görə hüquqi məsuliyyət daşımalı olmadıqlarını bildirirlər.

Məhkəmədə çıxış edən Corc Nikolau isə oğlunun sosial media üzərindən hədəfə alındığını və təhdid edildiyini deyib. O, yaşadıqları faciədən sonra ədalət axtarışı ilə məhkəməyə müraciət etdiklərini vurğulayıb.

Məhkəmə prosesi çərçivəsində “Meta”nın baş icraçı direktoru Mark Zakerberqin, “Instagram”ın rəhbərinin və “YouTube”un baş direktorunun da ifadə verməsi gözlənilir.

Paşa Məmmədli