Bankların kredit vermədiyi biznesdə müştərilər şirkətin ortağı oldu- "BrewDog" un uğur hekayəsi

Şotlandiyanın məşhur pivə brendi "BrewDog" un uğur hekayəsi ənənəvi biznes modellərindən fərqlənir.

Valyuta.az xəbər verir ki, şirkətin qurucuları James Watt və Martin Dickie fəaliyyətlərinin ilk illərində maliyyə çatışmazlığı ilə üzləşiblər və banklardan kredit almaqda çətinlik çəkiblər.

2009-cu ildə maliyyə mənbələrinin məhdudlaşması fonunda sahibkarlar qeyri-adi addım ataraq “Equity for Punks” adlı proqramı işə salıblar. Layihə çərçivəsində adi müştərilərə və pivə həvəskarlarına şirkətin səhmlərini almaq imkanı yaradılıb. Bu model sayəsində "BrewDog" ənənəvi investorlar əvəzinə öz müştərilərindən maliyyə cəlb etməyə başlayıb. İlk mərhələdə 1.300-dən çox insan şirkətə investisiya qoyub.

Sonrakı illərdə proqram daha da genişlənib. Müxtəlif mərhələlərdə yüz minlərlə investor "BrewDog" un səhmdarına çevrilib və şirkət bu yolla 100 milyon funt sterlinqdən çox vəsait toplamağa nail olub.

"BrewDog" un uğurunun əsas səbəblərindən biri müştəriləri yalnız alıcı kimi deyil, həm də şirkətin tərəfdarı və ortağı kimi cəlb etməsi olub. Bu yanaşma brendin tanınmasına və sürətli böyüməsinə mühüm töhfə verib.

Bu gün "BrewDog" dünyanın müxtəlif ölkələrində fəaliyyət göstərən tanınmış pivə istehsalçılarından biri hesab olunur.

Mayya Hüseynova