Azərbaycan əhalisi ən çox bu sosial şəbəkə hesablarından istifadə edir

Azərbaycanda əhalinin mobil sosial şəbəkələrdə fəallığını əks etdirən yanvar-dekabr ayı üzrə statistika açıqlanıb.

Valyuta.az xəbər verir ki, hesabatda Azərbaycan əhalisinin mobil tətbiqlər üzərindən sosial şəbəkələr üzrə fəallığı əks olunub.
Sözügedən dövr ərzində mobil platformalarda ən aktiv istifadə edilən sosial şəbəkə "İnstagram" olub. Platformanın payı 44,96% təşkil edib. Qeyd edək ki, "İnstagram" üzrə ən yüksək aktivlik ötən ilin noyabr ayında qeydə alınıb və bu göstərici 52,91%-ə çatıb.

İkinci sırada "YouTube" qərarlaşıb. Yanvar-dekabr ayları üzrə "YouTube"un payı 25,7% olub. Platformada ən yüksək aktivlik isə may ayında müşahidə edilib - 37,7%.

Üçüncü yerdə "Facebook" qərarlaşıb. Sosial şəbəkənin yanvar-dekabr göstəricisi 19,21% olub. "Facebook" üzrə pik aktivlik aprel ayında qeydə alınıb və 49,92% təşkil edib.

Digər sosial şəbəkələr üzrə göstəricilər isə belədir:

"Pinterest" dekabr ayında 3,93% payla təmsil olunub. Platformada ən yüksək aktivlik fevral ayında qeydə alınıb - 13,12%.
"Twitter" (X) üzrə dekabr göstəricisi 3,5% olub. Ən aktiv dövr isə oktyabr ayı olub -24,86%.
"LinkedIn" dekabr ayında 2,1% payla siyahını tamamlayıb. Bu platforma üzrə ən yüksək aktivlik məhz dekabr ayında qeydə alınıb - 2,09%.

Sərvanə Rəmixanova