Avropada istirahət üçün ən ucuz ölkələr

Avropada istirahətin dəyəri seçilən istiqamətdən və xərclərin strukturundan asılı olaraq əhəmiyyətli dərəcədə fərqlənə bilər.

Valyuta.az "Euronews"a istinadən xəbər verir ki, səyahəti bron etməzdən əvvəl yaşayış, qidalanma və gündəlik xərclərin orta qiymətlərini müqayisə etmək faydalıdır. Çünki hətta məşhur turizm ölkələri arasında da qiymət fərqləri böyük ola bilər.

Avropada istirahət üçün ən ucuz ölkə hansıdır?

Araşdırma müəllifləri qeyd edirlər ki, statistik göstəricilər bütöv ölkə üzrə orta qiymətləri əks etdirir, ayrı-ayrı kurort şəhərlərindəki qiymətləri deyil. Buna görə də paytaxtlarda və populyar turizm bölgələrində yaşayış və xidmətlərin qiyməti ölkə üzrə orta göstəricidən daha yüksək ola bilər.

"Euronews"un məlumatına görə, ümumi qiymət səviyyəsinə görə ən sərfəli ölkə Türkiyədir. Araşdırmaya əsasən, Avropa İttifaqı ölkələrində orta istehlak səbətinin dəyəri 100 avro olduğu halda, Türkiyədə bu göstərici təxminən 59,6 avro təşkil edir.

Araşdırmada ən bahalı ölkə isə Fransa olub.

Otellər və restoranlar harada daha ucuzdur?

Yaşayış və qidalanma səyahət büdcəsinin ən böyük hissəsini təşkil edir. Araşdırmaya görə, otel və restoran qiymətlərinin ən yüksək olduğu ölkə Fransadır.

Ən sərfəli istiqamət isə Portuqaliyadır. Bu ölkədə otel və restoran qiymətləri Avropa İttifaqı üzrə orta göstəricidən təxminən 26,4% aşağıdır.

Alkoqollu içkilər harada daha ucuzdur?

Araşdırmada alkoqollu içkilərin qiymətləri də müqayisə edilib. Maraqlıdır ki, ümumi qiymətlərin aşağı olmasına baxmayaraq, Türkiyədə alkoqollu içkilər araşdırmaya daxil edilən ölkələr arasında ən bahalı hesab olunur.

Ən sərfəli qiymətlər isə İtaliyada qeydə alınıb.

Büdcəli səyahət planlaşdırarkən nələrə diqqət etmək lazımdır?

"Euronews" vurğulayır ki, yalnız orta qiymətlərə əsaslanmaq düzgün deyil. Səyahətin yekun büdcəsinə mövsüm, seçilən region, nəqliyyat vasitəsi, otelin kateqoriyası və şəxsi xərclər təsir göstərir.

Ekspertlər həmçinin yaşayış yerini əvvəlcədən bron etməyi, nəqliyyat qiymətlərini müqayisə etməyi və turist sığortası almağı tövsiyə edirlər. Bu, gözlənilməz xərclərin qarşısını almağa və səyahəti daha rahat keçirməyə kömək edə bilər.

Paşa Məmmədli