"SoftBank"ın "OpenAI"a yatırımı üçün cəlb etdiyi 40 milyard dollarlıq kreditə daha 21 kreditor qoşulub

Yaponiyanın "SoftBank Group" şirkətinin ABŞ-ın süni intellekt nəhəngi "OpenAI"a yatırımı maliyyələşdirmək üçün cəlb etdiyi 40 milyard ABŞ dolları həcmində körpü kreditinə (bridge loan) daha 21 maliyyə institutu qoşulub.

Valyuta.az xəbər verir ki, yeni sindikasiya mərhələsində kredit paketinin təxminən 7 milyard ABŞ dolları bu maliyyə qurumları arasında bölüşdürülüb.

Mənbələrin bildirdiyinə görə, "First Abu Dhabi Bank", "GIC" və "Standard Chartered Bank"ın hər biri kredit paketindən təxminən 1 milyard ABŞ dolları həcmində pay götürüb. Qalan məbləğ isə Avropa, Yaponiya və Tayvandan olan bir sıra banklar arasında bölüşdürülüb.

Hazırda kreditin qalan 33 milyard ABŞ dolları ilkin anderrayterlər və aparıcı kreditorların balansındadır. Mənbələrin sözlərinə görə, bu hissənin də gələcəkdə daha geniş investor dairəsi arasında yenidən sindikasiyası mümkündür. Maliyyə bazarında iri kredit əməliyyatlarının sonradan daha çox iştirakçı arasında bölüşdürülməsi geniş yayılmış praktikadır.

2026-cı ilin martında imzalanan 12 aylıq kredit sazişi Asiya-Sakit okean regionunda indiyədək həyata keçirilən ən böyük körpü maliyyələşdirmələrindən biri hesab olunur. Əməliyyatın anderrayterlərə 100 milyon ABŞ dollarından çox komissiya gəliri gətirəcəyi gözlənilir.

Kredit may ayında ümumi sindikasiya mərhələsinə çıxarılmazdan əvvəl də doqquz yeni bank tərəfindən dəstəklənmişdi. Bu, bəzi bankirlərin "SoftBank"ın "OpenAI"a yüksək maliyyə məruz qalması və şirkətin "Anthropic" kimi rəqiblərlə artan rəqabət fonunda üzləşdiyi risklərlə bağlı narahatlıqlarına baxmayaraq baş verib.

"SoftBank", "First Abu Dhabi Bank", "Standard Chartered Bank" və "GIC" məsələ ilə bağlı şərh verməkdən imtina ediblər.

Məlumata görə, körpü kreditinin ilkin faiz marjası təminatlı bir gecəlik maliyyələşdirmə dərəcəsindən (SOFR) 250 baza bəndi yüksək müəyyən edilib. Hazırkı SOFR səviyyəsi nəzərə alınmaqla kredit üzrə illik faiz dərəcəsi təxminən 6,14 faiz təşkil edir.

"SoftBank"ın təsisçisi və baş icraçı direktoru Masayoşi Son daha əvvəl "OpenAI"a yatırımlarla bağlı "tam gücü ilə irəliləyəcəyini" açıqlamışdı. Hazırda şirkətin "OpenAI" qarşısında öhdəliklərinin ümumi həcmi 60 milyard ABŞ dollarını ötür.

Qeyd edək ki, "OpenAI" ötən ay birjada ilkin kütləvi yerləşdirmə (IPO) üçün müraciət edib. Şirkət mart ayında keçirilən investisiya raundunda 852 milyard ABŞ dolları dəyərində qiymətləndirilib.

Tənzilə Ağabalayeva