"Tesla Cybertruck" ABŞ tarixinin ən böyük uğursuzluqlarından birinə çevrilə bilər

"Tesla" şirkətinin rəhbəri İlon Maskın inqilabi avtomobil kimi təqdim etdiyi "Tesla Cybertruck" elektrik pikapı ABŞ avtomobil sənayesi tarixinin ən böyük kommersiya uğursuzluqlarından birinə çevrilə bilər. 

Valyuta.az xəbər verir ki, bu barədə "Futurism" nəşri yazıb.

Nəşrin məlumatına görə, “Cybertruck” satışa çıxarılmazdan əvvəl İlon Mask onu “apokalipsisdən belə sağ çıxacaq tank” kimi təqdim edir, həm möhkəmliyi, həm də qeyri-adi dizaynı ilə seçiləcəyini bildirirdi. Lakin model bazara çıxdıqdan sonra etibarlılığı ilə bağlı tənqid olunub, xarici görünüşü isə çoxsaylı zarafat və tənqidlərin hədəfinə çevrilib.

Məqalədə bildirilir ki, ən böyük məyusedici məqam satış göstəriciləri olub. İlon Mask əvvəllər “Tesla”nın ildə 500 minədək “Cybertruck” sata biləcəyini proqnozlaşdırırdı. Lakin faktiki nəticələr bu gözləntilərdən xeyli aşağı olub. Satışların ilk tam ilində şirkət 40 min avtomobil həddinə belə çata bilməyib.

Sonrakı dövrdə vəziyyət daha da pisləşib. “S&P Global Mobility”nin məlumatlarına istinad edən nəşr yazır ki, cari il ərzində ABŞ-də təxminən 7 100 ədəd “Cybertruck” satılıb. Müəlliflər həmçinin qeyd edirlər ki, “Tesla” satış statistikasını qismən İlon Maska məxsus digər şirkətlərə avtomobillər satmaqla dəstəkləyib.

Məqalə müəllifləri “Cybertruck” ətrafındakı vəziyyəti 1950-ci illərin sonunda böyük uğursuzluqla yadda qalan “Ford Edsel” modeli ilə müqayisə edirlər. Həmin dövrdə də “Ford” geniş reklam kampaniyası aparmış və ilk ildə 200 min avtomobil satacağını proqnozlaşdırmışdı. Lakin şirkət planlaşdırılan satışların üçdəbirindən də azına nail olmuşdu. Buna səbəblərdən biri də bir çoxlarının “çox eybəcər” hesab etdiyi qeyri-adi dizayn idi.

Nəşr vurğulayır ki, planlaşdırılan və faktiki satışlar müqayisə edildikdə, “Cybertruck” əfsanəvi uğursuz model olan “Ford Edsel”dən də zəif nəticə göstərir. Buna görə də İlon Maskın elektrik pikapı ABŞ avtomobil sənayesi tarixinin ən böyük uğursuzluqlarından biri hesab oluna bilər.

Bununla belə, “Ford”dan fərqli olaraq, “Tesla”nın yaxın vaxtlarda “Cybertruck” istehsalından tamamilə imtina edəcəyi gözlənilmir. Model İlon Maskın baxışlarının mühüm simvollarından biri olaraq qalır.

“CFRA Research” analitiki Qarret Nelson (Garrett Nelson) hesab edir ki, şirkət tələbi artırmaq üçün avtomobilin dizaynını yeniləyə və ya yeni modifikasiya təqdim edə bilər.

“Lakin biz hesab edirik ki, bu, həqiqətən də nəticəsiz cəhd olacaq”, deyə o bildirib.

Paşa Məmmədli