Qlobal bazarlarda ABŞ aktivlərindən çıxış davam edir

ABŞ-ın səhmləri, dolları və uzunmüddətli dövlət istiqrazlarından çıxış tempi sabit qalır.

Trampın ABŞ Federal Ehtiyat Sisteminin (Federal Reserve) sədri Cerom Pauellə (Jerome Powell) bağlı tənqidlərini davam etdirməsi fonunda ABŞ-ın səhmləri, dolları və uzunmüddətli dövlət istiqrazlarından çıxış tempi dəyişməz qalır.

Valyuta.Az-ın verdiyi xəbərə görə, "S&P 500" indeksindəki enişə texnologiya səhmləri də qoşulub və "Nasdaq 100" bazar ertəsi gününü 2,5 faiz azalma ilə başa vurub. ABŞ-ın səhmlərinə dair fyuçerslər səhər saatlarında 0,3 faiz yüksələrək cüzi bərpa siqnalları verir.

Zərərlər qlobal miqyasda da müşahidə olunur; "MSCI Dünya İndeksi" 1,5 faiz azalma ilə ticarətə davam edib. Dolların genişmiqyaslı dəyər itirməsi davam edir. "Bloomberg Dollar İndeksi" bu gün də 0,7 faiz geriləyərək son 15 ayın ən aşağı səviyyəsinə enib.

Etibarlı valyutalardan sayılan İsveçrə frankı dollar qarşısında 1 faizədək möhkəmlənib. ABŞ-ın uzunmüddətli istiqrazlarında da geriləmə davam edir. 10 illik xəzinə istiqrazlarının gəliri doqquz baza bəndi artaraq 4,42 faizə çatıb.

Bu gün Beynəlxalq Valyuta Fondu (IMF) dünya və ölkələr üzrə iqtisadi artım və digər göstəricilərlə bağlı proqnozlarını açıqlayacaq. Vaşinqtonda keçirilən IMF və Dünya Bankının bahar toplantılarında iştirak edən Türkiyənin xəzinə və maliyyə naziri Mehmet Şimşək Bakı vaxtı ilə saat 23:45-də "Atlantic Council" panelində çıxış edəcək.

Fed üzvlərindən Filip Ceferson (Philip Jefferson) və Patrik Harker (Patrick Harker) isə İqtisadi Hərəkətlilik Zirvəsində müvafiq olaraq saat 16:00 və 16:30-da çıxış edəcəklər.

Aydın

 ABŞ iqtisadiyyatı, dollar indeksi, ABŞ istiqrazları, "S&P 500", "Nasdaq 100", "Bloomberg Dollar İndeksi", IMF proqnozları, Mehmet Şimşək, Fed rəsmiləri, qlobal bazarlar