"Cloudflare"in çökmə səbəbi məlum olub

İnternetin qlobal infrastruktur təminatçılarından biri olan “Cloudflare” 18 noyabr 2025-ci ildə baş vermiş genişmiqyaslı xidmət pozuntusunun səbəblərini açıqlayıb. 

Şirkətin texniki direktoru bildirib ki, problemin kökündə sistem daxilində uzun müddət mövcud olan, lakin indiyədək aşkarlanmayan “gizli proqram xətası” (latent bug) dayanır. Valyuta.Az-ın verdiyi xəbərə görə, bu xəta adi bir konfiqurasiya yeniləməsi zamanı aktivləşərək, sistemdə zəncirvari nasazlığa yol açıb.

ABŞ mətbuatının verdiyi məlumata əsasən, həmin yeniləmənin tərkibində olan avtomatik yaradılmış konfiqurasiya faylı nəzərdə tutulan həddən artıq böyük ölçüdə olub. Fayl təhdid trafikini idarə etmək məqsədi daşısa da, ölçüsünün kritik həddi aşması nəticəsində proqram sistemində çökmə baş verib. Şirkət tərəfindən qeyd olunub ki, hadisənin heç bir kiberhücumla əlaqəsi yoxdur.

Hadisə ABŞ-şərqi vaxtı ilə saat 6:30 radələrində başlayıb və nəticədə “ChatGPT”, “X” (əvvəllər Twitter), müxtəlif onlayn oyun platformaları, maliyyə xidmətləri və logistik sistemlər daxil olmaqla, bir sıra qlobal xidmətlərdə fasilələr müşahidə olunub. Problem bir neçə saatdan sonra aradan qaldırılsa da, geniş təsir dairəsi və yaranan narahatlıq ciddi müzakirələrə səbəb olub.

Şirkət yaranmış narahatlığa görə ictimaiyyətdən rəsmi şəkildə üzr istəyib və bu kimi hadisələrin qarşısını almaq üçün təhlükəsizlik və test proseslərinin təkmilləşdiriləcəyini açıqlayıb.

Mütəxəssislər bu hadisəni müasir internetin struktur zəifliklərinin göstəricisi kimi dəyərləndirirlər. “Amazon Web Services” (AWS) platformasında baş verən oxşar nasazlıqdan sonra ardıcıl ikinci belə texniki problem, internetin cəmi bir neçə əsas infrastruktur təminatçısından nə qədər asılı olduğunu bir daha göstərib.

Qlobal veb-saytların təxminən 20%-nə xidmət göstərən “Cloudflare” kimi sistemlərdə yaranan hər hansı nasazlıq bütün rəqəmsal ekosistemi iflic etmək gücünə malikdir. Bu isə dövlətlər, özəl sektor və istifadəçilər üçün mühüm xəbərdarlıq siqnalıdır.