"Bitcoin" dörd həftədir dəyər itirir: qiymət hansı istiqamətə hərəkət edəcək?

"Bitcoin" artıq dörd həftədir fasiləsiz olaraq ucuzlaşır və bu proses ilin ən uzun eniş seriyalarından birinə çevrilib. Valyuta.Az-ın məlumatına görə, bu zəiflik xüsusilə ABŞ ticarət saatlarında güclənir, bu da həm spot bazara, həm də "ETF" seqmentinə əlavə təzyiq yaradır və "Bitcoin"-in qısamüddətli perspektivinə dair qeyri-müəyyənliyi artırır.

"Coinbase Premium Gap" göstəricisinin mənfi 90 dollaradək düşməsi ABŞ-lı investorlar arasında satış meylinin yüksək olduğunu göstərir. Ay ərzində ABŞ ticarət saatlarında gəlirlər mənfi qalsa da, Avropa və Asiya-Sakit okean (APAC) regionlarında nisbətən sabit və ya zəif müsbət dinamika müşahidə olunub. Bu tendensiya "ETF" bazarında da əksini tapıb — artıq üç həftədir ardıcıl olaraq "Bitcoin" "ETF"lərindən xalis çıxış qeydə alınır. Ötən ilin eyni dövründə 194.000 BTC-lik giriş olmuşdusa, bu il cəmi 8.000 BTC-lik çıxış baş verib.

Nəticədə "ETF" aktivlərinin ümumi həcmi 3,98 milyard dollar azalıb ki, bu da "ETF"lərin istifadəyə verilməsindən bəri qeydə alınan ikinci ən böyük geriləmədir.

"Bitcoin" qiymətində növbəti kritik səviyyə

"CryptoQuant"ın hesablamalarına əsasən, hazırda "ETF"lər üzrə reallaşmış orta alış qiyməti 86.586 dollar səviyyəsindədir. Bu göstərici "ETF MVRV" nisbətinin 1,08 olduğunu və sərmayəçilərin orta hesabla hələ də təxminən 5% qazancda olduğunu göstərir.

Təhlilə görə, 86.586 dollar səviyyəsi yaxın dövrdə əsas dəstək rolunu oynaya bilər. Əgər "Bitcoin" bu səviyyənin üzərində möhkəmlənsə, satış təzyiqi azala və bazarda qısamüddətli sabitlik yarana bilər. Əks halda, bu həddin altına düşmək yeni satış dalğasını stimullaşdıra və qiymətin daha aşağı səviyyələrə yönəlməsinə səbəb ola bilər.

Bazar iştirakçıları xüsusilə ABŞ ticarət saatlarında müşahidə olunan satış təzyiqinin davam edib-etməyəcəyini diqqətlə izləyirlər.