Yaponiyalı investorlar pulu özlərinə, Norveçlilər isə ABŞ-yə yatırır

ABŞ-da investorlar səhmlər portfelinin 78 faizini yerli aktivlərə yönəldir. Bu göstərici, “yerli meyl” adlandırılan və investorların öz bazarlarına üstünlük verdiklərini əks etdirən tendensiyanın ən bariz nümunələrindəndir.

Valyuta.az xəbər verir ki, bu meyl Yaponiyada da güclüdür - yerli investorlar əsasən daxili bazara sərmayə yatırır. Hər iki halda bu yanaşma, müvafiq ölkələrin qlobal maliyyə sistemində tutduğu aparıcı mövqelərlə izah olunur.

Digər tərəfdən, bəzi ölkələrin investorları portfellərində ABŞ səhmlərinə böyük yer ayırır. Norveçdə bu göstərici 48, Kanadada isə 45 faiz təşkil edir. Maraqlı hal odur ki, Norveç investorları 2020-ci ildən bəri illik orta hesabla 13,7 faiz gəlir əldə etmələrinə baxmayaraq, səhmlərinin cəmi 12 faizini yerli bazarda saxlayırlar. Böyük Britaniyada da xarici bazarlara üstünlük verilir. Burada səhmlərin yalnız 19 faizi daxildə yerləşir. Bu vəziyyət zəif daxili bazar performansı və “Brexit”in uzunmüddətli təsirləri ilə əlaqələndirilir. 2020-ci ildən bu yana FTSE 100 indeksi illik orta hesabla 5 faizdən az gəlir təqdim edib.

İstiqrazlar üzrə bölgüyə baxıldıqda, Yaponiyada investorların 80 faizi bu alətləri yerli bazarda saxlayır ki, bu da “yerli meyl”in istiqrazlar sahəsində ən yüksək ifadəsidir. Avropada da oxşar meyillər müşahidə olunur - istiqrazların 69 faizi daxildə yerləşdirilir. Bu davranışa tanışlıq faktoru və vergi güzəştləri kimi amillər təsir edir.

İsveçrə investorları isə xarici istiqrazlara, xüsusilə ABŞ bazarına əhəmiyyətli pay ayırırlar. Onların portfellərində ABŞ istiqrazlarının çəkisi 33 faiz təşkil edir. Bu, İsveçrə frankının sabitliyi və ölkədəki 0 faiz faiz dərəcəsi fonunda ABŞ istiqrazlarının daha yüksək gəlirlilik təklif etməsi ilə izah olunur.

Mayya Hüseynova