Tövlədən idarə etdiyi biznesi dünyada məşhur imperiyaya çevirdi

Bu gün dünyada ən tanınmış mebel brendlərindən biri olan İKEA-nın əsası 1943-cü ildə, İsveçin Smaland bölgəsində qoyulub. Şirkətin yaradıcısı İngvar Kamprad cəmi 17 yaşında olarkən İKEA-nı ticarət şirkəti kimi rəsmi qeydiyyatdan keçirib.

Biznes bir tövlədən başladı

İngvar Kamprad yeniyetməlik illərində biznesini ailəsinə məxsus Elmtaryd fermasında, kiçik bir tövlədən idarə edirdi. Burada saxladığı sifarişlər səhərlər süd yığan yük maşını ilə müştərilərə çatdırılırdı. İlk dövrlərdə İKEA mebel deyil, qələm, saat, neylon corab və xırda məişət məhsulları satırdı.

Mebela keçid təsadüfi olmadı

İdxal lisenziyaları ilə bağlı yaranan problemlər Kampradı yeni çıxış yolu axtarmağa vadar etdi. O, bazarda istehsalçı ilə alıcı arasında böyük boşluq olduğunu gördü və bu boşluğu doldurmaq qərarına gəldi. Beləliklə, 1948-ci ildən etibarən mebel məhsulları İKEA-nın çeşidinə daxil edildi.

“Əsas problem istehsal yox, paylanmadır”

Kamprad Qöteborgda biznes məktəbində oxuduğu dövrdə “taylorizm” nəzəriyyələri ilə tanış oldu. Onu ən çox təəccübləndirən məqam istehsal proseslərinin səmərəli qurulmasına baxmayaraq, paylanma mərhələsinin köhnə və bahalı qalması idi. Məhz bu dövrdə o, gələcəyinin ucuz və effektiv paylanma sistemi qurmaqdan keçdiyinə qərar verdi.

Kamprad sonralar deyib ki, uğurlu sahibkar olmaq üçün məhsulu zavoddan birbaşa müştəriyə ən sadə və ucuz yolla çatdırmağı bacarmaq lazımdır.

Satış təcrübəsi uşaqlıqdan gəlirdi

İngvar hələ uşaq yaşlarında kibrit, Milkölen gölündən tutduğu balıqları satırdı. Sonralar Milad açıqcaları, toxumlar, qələmlər, pulqabılar və bəzək əşyaları ticarəti ilə məşğul oldu. O, müştərilərlə açıq və səmimi ünsiyyət qurur, qiymət siyahılarını və məktubları özü yazırdı. Müştəri məmnuniyyəti onun üçün əsas prinsip idi.

İlk böyük səhv və vacib dərs

1940-cı illərin sonlarında Kamprad Qöteborgda çox ucuz qiymətə qələm alacağına razılaşdı. Lakin məhsullar çatdırıldıqda qiymətin qalxdığı məlum oldu və o, hər qələm üzrə zərərə düşdü. Bu hadisə onu sarsıtsa da, sonradan İKEA mədəniyyətinin əsas prinsiplərindən birinə çevrildi: səhv etmək və ondan dərs çıxarmaq.

Qələmdən mebelə aparan yol

1940-cı illərin sonunda Kamprad əsas rəqibinin mebel satışına başladığını gördü. Smaland bölgəsinin meşələrlə əhatə olunması və burada çoxlu kiçik mebel emalatxanalarının mövcudluğu onun üçün yeni istiqaməti aydın göstərdi. Beləliklə, Parisdən idxal edilən qələmlərdən Smalandda istehsal olunan taxta mebellərə keçid baş verdi.

Bu qərar sonradan İKEA-nı qlobal mebel imperiyasına çevirən dönüş nöqtəsi oldu.

Sərvanə Rəmixanova