Tap.az-ın sahibi Hepsiburada-nın CEO-sunu işdən çıxarır

“Hepsiburada” şirkəti, baş direktor Nilhan Önal Gökçetekinin 1 iyul 2026-cı ildə vəzifəsindən ayrılacağını açıqlayıb.

Valyuta.az xəbər verir ki, bu qərarla birlikdə şirkət rəhbərliyində dəyişiklik prosesinə start verilib.

Şirkətdən verilən açıqlamada qeyd olunub ki, son illər ərzində maliyyə intizamının gücləndirilməsi və iş modelinin möhkəmləndirilməsi prioritet olub. Bu mərhələnin tamamlanmasından sonra, rəhbərlik və CEO vəzifə dəyişikliyinin vaxtı ilə bağlı ortaq razılığa gəlib. Bildirilib ki, təhvil-təslim prosesi şirkətin fəaliyyətində heç bir fasilə olmadan mərhələli şəkildə həyata keçiriləcək.

“Hepsiburada”nın İdarə Heyətinin sədri Mixeil Lomtadze, Gökçetekinin rəhbərliyi dövründə şirkətin maliyyə strukturunu gücləndirdiyini və uzunmüddətli strategiyanın tətbiqi imkanlarını artırdığını vurğulayıb. O, növbəti CEO-nun şirkət daxilində yetişən rəhbərlər arasından seçiləcəyini bildirib.

Nilhan Önal Gökçetekin isə keçid dövründə rəhbərlik komandası ilə sıx əməkdaşlığı davam etdirəcəyini açıqlayıb. O, təhvil prosesi tamamlandıqdan sonra yeni bir karyera mərhələsinə hazırlaşacağını qeyd edib. Şirkət, rəhbərlikdəki dəyişikliklərlə bağlı yeniliklərin yaxın dövrdə ictimaiyyət və maraqlı tərəflərlə paylaşılacağını bəyan edib.

Xatırladaq ki, Nilhan Önal Gökçetekin “Amazon” və “Procter & Gamble” da daxil olmaqla bir sıra “Fortune 500” şirkətlərində pərakəndə satış, sürətli istehlak malları, istehlak elektronikası və konsaltinq sahələrində təcrübəyə malikdir.

Mixail Lomtadze həm də Azərbaycanın populyar internet layihələrindən 4-nün – “turbo.az”, “tap.az”, “boss.az” və “bina.az”ın sahibidir.

Məlumat üçün bildirək ki, Gürcüstan vətəndaşı olan 50 yaşlı Mixail Lomtadze Qazaxıstanın ən böyük şirkətlərindən olan “Kaspi.kz”nin əsas səhmdarlarından biridir. Mixail Lomtadze eyni zamanda Qazaxıstanın ən böyük banklarından biri olan “Kaspi Bank”ın 23%-lik səhminə nəzarət edir.

Mətbuatın yazdığına görə Mixail Lomtadze “Kaspi Bank”ın səhmlərini Nusultan Nazarbayevin hazırda həbsdə olan qardaşı oğlu Kayrat Satıbaldıulından alıb.

Mayya Hüseynova