Səudiyyə Ərəbistanı İran müharibəsi səbəbindən ticarət yollarını dəyişib

Ər-Riyad ABŞ və İsrailin İrana qarşı hərbi münaqişəsi başladıqdan sonra logistika marşrutlarını Hörmüz boğazından Qırmızı dənizə yönləndirib. 

Valyuta.az xəbər verir ki, bu barədə Səudiyyə Ərəbistanının sənaye və mineral ehtiyatlar naziri Bəndər əl-Xurayf TASS-a verdiyi müsahibədə bildirib.

Onun sözlərinə görə, Səudiyyə Ərəbistanı yüksək dayanıqlılıq nümayiş etdirərək fəaliyyətini və inkişafını davam etdirdiyini göstərib. Nazir qeyd edib ki, gübrə istehsalı sahəsində ölkə böyük ixracatçılardan biridir, lakin böhranın əvvəlində tədarüklərdə azalma baş verib, çünki ixracın əsas hissəsi Fars körfəzi və Hörmüz boğazı vasitəsilə həyata keçirilirdi.

Məlumata görə, 28 fevralda ABŞ İsraillə birlikdə İrana qarşı hərbi əməliyyata başlayıb. Bunun ardınca Tehran İsrailə, ABŞ bazalarına və Yaxın Şərqdəki neft infrastrukturuna raket və dron zərbələri endirib. Eyni zamanda İran Hörmüz boğazını bağlayıb və bu ərazi dünya neft daşımalarının təxminən 30 faizini təmin edirdi. 8 apreldən etibarən ABŞ və İran arasında müvəqqəti atəşkəs qüvvədədir.

İran Xarici İşlər Nazirliyinin nümayəndəsi İsmayıl Bəqai 8 iyunda bildirib ki, İsrailin yeni hücumlarına baxmayaraq, Tehranla Vaşinqton arasında danışıqlar davam edir. Onun sözlərinə görə, İran İsrailin hücumlarının ABŞ Mərkəzi Komandanlığı ilə tam koordinasiyada həyata keçirildiyinə inanır.

Paşa Məmmədli