Dəbdəbə kəskin ucuzlaşdı: Dubayın elit otelləri qiymətləri 4 dəfə endirdi

Dubaydakı otellər turistləri cəlb etmək üçün müxtəlif addımlar atır və keçmişdəki yüksək tələbat dövrlərinə qayıtmağı ümid edir.

Valyuta.az xəbər verir ki, süni Palm Cümeyra adasında yerləşən 5 ulduzlu lüks otellərin geniş lobbiləri həftəsonları və bayram günlərində yerli sakinlərin axını sayəsində yenidən canlanmağa başlayıb. Məlumata görə, bu artım əsasən xüsusi endirim kampaniyaları ilə bağlıdır.

Dubayda yaşayan livanlı həkim Fadi İskandarani bildirib ki, o, əvvəllər qiymətlərin çox yüksək olması səbəbindən Palm Cümeyrada qalmaq imkanından istifadə etməyib, lakin rezidentlər üçün tətbiq olunan dörd dəfə ucuz tariflər sayəsində bu lüks artıq əlçatan olub.

Bununla belə, ümumi turist axınının hələ də zəif olduğu və bir çox otelin hətta bəzi mərtəbələri bağlamağa məcbur qaldığı bildirilir.

Məlumata görə, ötən il Dubayda 19,5 milyon turist qeydə alınıb və şəhər regionun ən populyar turizm mərkəzlərindən biri olub. 827 oteldən 173-ü 5 ulduzlu olmaqla orta doluluq səviyyəsi 80 faizdən yuxarı idi.

Lakin İranda baş verən və regiona təsir edən münaqişə Dubayın “sabitlik imici”nə mənfi təsir göstərib.

Bəzi turistlər atəşkəsdən sonra geri dönsə də, ümumi bərpa prosesi zəif gedir. “Anantara The Palm” otelinin meneceri Maykl Robinson bildirib ki, həftəsonları doluluq 90 faizi keçsə də, həftəiçi bu göstərici 20–30 faizə düşür.

O həmçinin qeyd edib ki, yay mövsümü yaxınlaşdıqca və ailələr şəhəri tərk etdikcə tələbatın daha da azalması mümkündür.

Bəzi otellər isə turist çatışmazlığı səbəbindən müvəqqəti bağlanmağa və ya təmirə gedib. Digərləri işçi ixtisarları və maaş azalmaları həyata keçirib. Məlumata görə, bəzi işçilərin maaşları 40 faizə qədər azaldılıb, bəzilərinə isə ödənişsiz məzuniyyət təklif olunub.

Paşa Məmmədli