Sərmayə qoyuluşu haqqında bilməli olduğunuz 7 qızıl qayda

Bəziləri düşünür ki, investisiya - bəxt məsələsidir. Qismən haqlıdırlar. Axı sərmayə yatırdığınız şirkətin, ümumi iqtisadiyyatın və ya sənayenin gələcəyini dəqiq bilmək mümkün deyil. Risk böyükdür, amma qazanc da bir o qədər yüksək ola bilər.

Qəti zəmanət olmasa da, investisiya kapital toplamaq üçün ən güclü vasitələrdən biridir. Bununla belə, düzgün zamanlama və strategiya ilə “bəxtinizi artırmaq” mümkündür.

Budur, uğurlu investisiyanın əsasını təşkil edən 7 qızıl qayda:

1. Tez başlayın və davamlı olun

İnvestisiyaya kiçik məbləğlə başlamağınız önəmli deyil – əsas odur ki, tez başlayasınız və mütəmadi davam etdirəsiniz. Mürəkkəb faiz uzunmüddətli dövrdə ən yüksək gəliri gətirə bilər. Əgər hələ başlamamısınızsa, özünüzü günahlandırmayın – indi başlayın və hər ay büdcənizə uyğun məbləğlə sərmayə qoyun. Gəliriniz artdıqca, investisiyanızı da artırın.

2. Yalnız itirməyə hazır olduğunuz məbləği yatırın

Əlbəttə, heç kim pul itirmək istəmir. Amma bazarda itki riski həmişə var. Buna görə də risk həddinizi müəyyən edin. Sərmayə qoyduğunuz məbləğin gündəlik xərclərinizi və həyat tərzinizi təhlükəyə atmamasına diqqət yetirin. İnvestisiyanı aylıq büdcənizin daimi bir xərc bəndi kimi qəbul edin.

3. Tanınmış sahələrə yatırım edin və uzunmüddətli düşünün

Məşhur investor Uorren Baffetin (Warren Buffett) prinsipidir: tanımadığınız şeyə sərmayə qoymayın. Bir şirkətə yatırım edərkən, siz artıq o şirkətin “hissədarı” olursunuz. Ona görə də onun məhsullarını, müştəri bazasını və rəqiblərini bilməlisiniz.

Qısamüddətli bazar tendensiyalarına qapılmaq cazibədar olsa da, əsl gəlirlər uzunmüddətli sərmayələrdə formalaşır. Sevdiyiniz və istifadə etdiyiniz məhsulları istehsal edən şirkətləri araşdırın – bu, yaxşı başlanğıc ola bilər.

4. Portfelinizi diversifikasiya edin

Bütün vəsaitinizi bir şirkətə və ya sektora yatırmaq böyük riskdir. Maliyyə portfeliniz müxtəlif sahələr və aktiv növləri üzrə bölüşdürülməlidir.
Bu portfelyə kiçik, orta və böyük şirkətlərin səhmləri, həmçinin gəlir gətirən və dəyər əsaslı aktivlər daxil ola bilər. Unutmayın ki, diversifikasiya bir dəfəlik deyil – zaman keçdikcə onu yenidən qiymətləndirməlisiniz.

Əgər çalışdığınız şirkətin səhmlərinə sahibsinizsə, bu da sizin ümumi investisiya yükünüzə daxildir və nəzərə alınmalıdır.

5. Bazarı zamanlamağa çalışmayın

Ən uğurlu investorlar uzunmüddətli strategiyaya sadiq qalırlar. Bazarın pik və ya minimum nöqtəsini düzgün təxmin etmək çox çətindir. Çox zaman investorlar bazar enəndə pullarını çıxarır, amma bu zaman artıq itki yaşamış olurlar. Daha sonra yenidən bazara gec daxil olaraq artımı da əldən verirlər. Buna görə də bazarda qalmaq və düzgün seçimlər etmək daha məqsədəuyğundur.

6. Komissiya haqlarına diqqət yetirin

Əldə etdiyiniz gəlirlərin əhəmiyyətli hissəsi komissiya və idarəetmə haqları ilə əriyə bilər. Ən aşağı xərcli seçim – komissiyasız onlayn hesabda sərmayələri özünüz idarə etməkdir. Əgər portfelinizi başqasına idarə etdirirsinizsə, onların xidmətinin haqları ilə gəlir nisbətini müqayisə edin. Kiçik faizlər belə illər ərzində əhəmiyyətli fərq yarada bilər.

7. Əks istiqamətli düşünün və portfeli mütəmadi nəzərdən keçirin

Yenə də Buffett deyir:

“Hamı qorxarkən tamahkar, hamı tamahkarlıq edərkən qorxaq olun.”
Yəni bazar psixologiyasına uymayın – strateji düşünün. Portfelinizi mütəmadi nəzərdən keçirin və balanslaşdırın. Məsələn, bir sektor digərlərindən daha çox qazanc gətirirsə, portfelinizdə onun çəkisi həddindən artıq arta bilər. Bu isə gələcəkdə riskli ola bilər.

Bazarda (düşüş zamanı) səbirli və ayıq olmaq şərti ilə yaxşı alış fürsətləri yaranır. Bütün başqaları satarkən siz alırsınızsa, gələcəkdə böyük qazanc əldə edə bilərsiniz.

Nəticə:
İnvestisiya — qeyri-müəyyənliklə dolu bir yol olsa da, bu 7 qızıl qaydaya əməl etməklə riskləri azaldıb uğura doğru irəliləmək mümkündür. Erken başlayın, planlı olun və investisiyaya uzunmüddətli baxın – uğur sizi gözləyir.

Tənzilə Ağabalayeva