“Sarvam” 234 milyon dollar investisiya alıb

“Sarvam” B seriyası investisiya turunda 234 milyon dollar investisiya əldə edib.

Valyuta.az xəbər verir ki, şirkət ümumilikdə 300 milyon dollar cəlb etməyi hədəfləyir və investisiya turu hələ yekunlaşmayıb.

Tam dövrlü süni intellekt həlləri hazırlayan Hindistan mərkəzli “Sarvam”ın B seriyası investisiya turunun 150 milyon dollarlıq hissəsi “HCLTech” tərəfindən yatırılıb. 

2023-cü ildə təsis edilən şirkətin dəyərləndirməsi bu investisiya turu ilə 1,5 milyard dollara yüksəlib.

“Sarvam” bildirib ki, yeni investisiyadan əsasən avtonom süni intellekt agentlərinin, proqram təminatı və kibertəhlükəsizlik yönümlü yeni nəsil modellərin hazırlanmasına, həmçinin artan tələbatı qarşılamaq üçün hesablama infrastrukturunun genişləndirilməsinə yönəldiləcək.

Vivek Raqavan (Vivek Raghavan) və Pratyuş Kumar (Pratyush Kumar) tərəfindən yaradılan “Sarvam” böyük dil modelləri hazırlayır. Şirkət xüsusilə Hindistan dillərinə və yerli istifadə ssenarilərinə uyğun həllərə fokuslanır, bu modellər əsasında korporativ süni intellekt məhsulları və infrastruktur xidmətləri təqdim edir.

Şirkət yalnız model hazırlamaqla kifayətlənmir, eyni zamanda həmin modellərin işlədiyi inferens (inference) infrastrukturunu və şirkətlərə, eləcə də dövlət qurumlarına yönəlmiş tətbiqləri də təqdim edir. “Sarvam” bankçılıq, sığorta, dövlət xidmətləri və müdafiə kimi sahələr üçün səsli köməkçilər, sənəd emalı sistemləri və süni intellekt agentləri hazırlayır.

Şirkətin nitq əsaslı süni intellekt sistemi gündəlik 2 milyondan çox qarşılıqlı əlaqəni emal edir. API infrastrukturu hər gün təxminən 10 milyon sorğuya xidmət göstərir. Səs tanıma modelləri ayda 500 min saatdan artıq audio məlumatı mətnə çevirir. Bundan əlavə, şirkətin sənəd emalı sistemləri 35 milyondan çox səhifənin rəqəmsallaşdırılmasında istifadə olunub.