Bu ölkə Cənub-Şərqi Asiyada kibercinayətkarlıq mərkəzinə çevrilir

Şri-Lanka regionda kibermərcə və dələduzluq mərkəzlərinə çevrilmə təhlükəsi ilə üzləşib. İlin əvvəlindən etibarən ölkə hakimiyyəti kiberdələduzluğa qarşı mübarizə çərçivəsində ondan çox reyd keçirib, bu fəaliyyətlə əlaqəli təxminən 700 xarici vətəndaşı saxlayıb və deportasiya edib.

Valyuta.az xəbər verir ki, bu barədə "The Guardian" yazıb.

Nəşrin məlumatına görə, Myanma və Kambocada bir neçə fırıldaqçı çağrı mərkəzinin dağıdılmasından sonra cinayətkar şəbəkələr Şri-Lankaya köçməyə başlayıb. Burada turist vizası asan əldə olunur, SİM kartlara və internetə ciddi məhdudiyyətlər yoxdur, həmçinin ucuz ofis sahələri geniş şəkildə kirayəyə verilir.

“The Guardian” jurnalistləri Kolomboda keçirilən son polis əməliyyatını işıqlandırmağa icazə alıblar. Əməliyyat zamanı 18 Çin vətəndaşı və 1 Laos vətəndaşı saxlanılıb. Onların istifadə etdiyi ofisdə onlarla saxta sənəd, o cümlədən ABŞ Xəzinədarlığı tərəfindən guya verilmiş sənədlər, 62 pasport, noutbuklar, smartfonlar və möhürlər aşkar edilib.

Polisin məlumatına görə, bu çağrı mərkəzinin arxasında Çin cinayət sindikatlarından biri dayanır. Şəbəkə ABŞ vətəndaşlarını mövcud olmayan bir şirkətə investisiya yatırmağa inandıraraq aldatmağa çalışıb. ABŞ rəqəmlərinə əsasən, 2024-cü ildə Cənub-Şərqi Asiyada fəaliyyət göstərən belə mərkəzlər nəticəsində amerikalılar 10 milyard dollardan çox ziyana düşüblər.

Kolombodakı Çin səfirliyi isə öz vətəndaşlarının bu cür çağrı mərkəzlərində iştirak etdiyini təsdiqləyib və Şri-Lanka hökumətinə cinayətkarlığa qarşı mübarizədə tam dəstək verdiyini bildirib.

Paşa Məmmədli