Bu il rekord sayda mərkəzi bank qızıl alacaq - "Bloomberg"

Dünya üzrə rekord sayda mərkəzi bank bu il qızıl ehtiyatlarını artırmağı planlaşdırır və bu ilki azalmaya baxmayaraq, qızılın tarixi artımının əsas səbəblərindən birini qoruyub saxlayır.

Valyuta.az xəbər verir ki, bu barədə "Bloomberg" yazıb.

Dünya Qızıl Şurası (WGC) və "YouGov Plc" tərəfindən 2018-ci ildən bəri aparılan sorğuda 74 mərkəzi bankın 45%-i 2026-cı ildə qızıl almağı planlaşdırdıqlarını bildirib. Bu, indiyə qədər qeydə alınmış ən yüksək göstəricidir. Cəmi bir bank ehtiyatlarını azaltmağı planlaşdırdığını açıqlayıb.

Son üç ildə qızılın qiyməti iki dəfədən çox artıb və bu artımda mərkəzi bankların alışları əsas rol oynayıb. Lakin bu il dinamika zəifləyib. Buna Yaxın Şərqdəki müharibə fonunda enerji daşıyıcılarının bahalaşması və faiz dərəcələrinin uzun müddət yüksək qalacağı gözləntiləri təsir göstərib.

Bu vəziyyət gəlir gətirməyən qızılın cəlbediciliyini azaldıb. Spekulyantlar ticarətdən çəkilib və son vaxtlar qiymətli metalın qiyməti noyabrdan bəri ən aşağı səviyyəyə düşüb. Bu eniş bəzi mərkəzi banklara alış üçün imkan yaradıb, analitiklər bildirir.

İlin birinci rübündə mərkəzi bankların qızıl alışı sürətlənib, baxmayaraq ki, Türkiyə, Rusiya və Azərbaycan öz ehtiyatlarını azaltmağa başlayıb.

Eyni zamanda “Reuters” 16 iyun, çərşənbə axşamı qızılın bahalaşdığını qeyd edir. ABŞ və İran arasında ilkin sülh razılaşması ABŞ Federal Ehtiyat Sisteminin faizləri artırmaq ehtimalı ilə bağlı narahatlıqları azaldıb.

Spot qızıl 0,3% bahalaşaraq 1 unsiya üçün 4 317,43 dollara (1 qram üçün 138,81 dollar) çatıb və ardıcıl dördüncü ticarət sessiyasında artımını davam etdirə bilər. ABŞ-da avqust ayında tədarük edilən qızıl fyuçersləri isə 0,3% ucuzlaşaraq 4 338,7 dollar (1 qram üçün 139,49 dollar) olub.

Analitiklər hesab edir ki, qızılın qiymət artımı bir neçə gün davam edə bilər və ABŞ–İran sazişinin 19 iyunda imzalanması ərəfəsində pik həddə çata bilər. ABŞ dolları 10 günlük minimumlara yaxın qalır ki, bu da qiyməti dollarla müəyyən olunan qızılı digər valyuta sahibləri üçün daha ucuz edir.

İnvestorlar həmçinin ABŞ Federal Ehtiyat Sisteminin 17 iyunda açıqlanacaq monetar siyasət qərarını izləyir. Ümumi gözləntilərə görə, faizlər yüksək səviyyədə saxlanılacaq. Yüksək faizlər qızılın cəlbediciliyini azaldır, çünki o, dividend və ya gəlir gətirmir.

Eyni zamanda Yaponiya Bankı 31 ilin maksimumuna çataraq faiz dərəcələrini artırıb və inflyasiya ilə mübarizə üçün sərtləşmə siyasətinə keçən digər mərkəzi banklara qoşulub.

Paşa Məmmədli