"SpaceX" səhm satışından 85,7 milyard dollar vəsait cəlb edib

İlon Maskın rəhbərlik etdiyi "SpaceX" şirkətinin ilkin kütləvi təklifinin (IPO) həcmi əlavə satış opsionunun istifadəsindən sonra 85,7 milyard ABŞ dollarına yüksəlib.

Valyuta.az xəbər verir ki, şirkət IPO çərçivəsində 555,56 milyon səhmi hər biri 135 ABŞ dollarından sataraq 75 milyard dollar vəsait cəlb edib. İnvestorlardan daxil olan sifarişlərin həcmi isə 250 milyard dolları ötüb ki, bu da əlavə 83,3 milyon səhmin satışına imkan verib.

"SpaceX" səhmləri "Nasdaq" birjasında ticarətə başladıqdan sonra ilk gündə 19 faiz bahalaşıb. Nəticədə şirkətin bazar dəyəri 2 trilyon ABŞ dollarını keçib. Sonrakı artımla "SpaceX" bazar kapitallaşmasına görə dünyanın ən böyük çip istehsalçılarından biri olan TSMC-ni də geridə qoyub.

Şirkət IPO-dan əldə olunan vəsaitin bir hissəsini təxminən 20 milyard dollarlıq borcların ödənilməsinə yönəltməyi planlaşdırır. Qalan vəsait isə süni intellekt infrastrukturu, raket buraxılışı sistemləri və "Starlink" peyk interneti şəbəkəsinin inkişafına sərf ediləcək.

"SpaceX"in 2027-ci ilin sonunadək kosmos əsaslı süni intellekt hesablama infrastrukturu üzrə ilk sınaqları həyata keçirməyi hədəflədiyi bildirilir.

Sərvanə Rəmixanova