Oyun sahəsində karyera üçün ən gəlirli ölkələr hansılardır?

Qlobal oyun inkişafı bazarının həcmi 2026-cı ildə 2,07 milyard dollardan 2031-ci ilə qədər 3,87 milyard dollara çatacaq. Bununla belə, artım regionlar üzrə qeyri-bərabər paylanır: bəzi bazarlar artıq sənayenin təxminən yarısına nəzarət edir, digərləri milyardlarla dollarlıq dövlət investisiyaları cəlb edir, bəziləri isə yalnız indi qlobal oyun sənayesi xəritəsində görünməyə başlayır.

Valyuta.az "TheTech"ə istinadən xəbər verir ki, 2025-ci ildə Asiya-Sakit okean regionunun payına qlobal oyun inkişafı gəlirlərinin 44,85%-i düşür ki, bu da bütün digər regionlardan yüksək göstəricidir. 

Bu liderlik bir neçə amillə izah olunur: Çin mobil oyun studiyalarının bazardakı güclü mövqeyi, Cənubi Koreyanın 5G texnologiyalarının tətbiqində üstünlüyü və Yaponiyanın uzun illərə söykənən konsol oyun ənənəsi.

Böyük bazarlarla yanaşı, regionda müəyyən istiqamətlər üzrə ixtisaslaşmış mərkəzlər də formalaşıb. Sinqapur və Malayziya beynəlxalq studiyaların istehsal prosesinin bir hissəsinin cəmləndiyi əsas məkanlara çevrilib. Buraya ilk növbədə qrafik materialların hazırlanması və lokallaşdırma xidmətləri daxildir. Nəticədə region təkcə ən böyük bazar deyil, həm də oyun sənayesində autsorsinq xidmətlərinin əsas mərkəzlərindən biri hesab olunur.

Ən yüksək artım tempi hazırda Yaxın Şərqdə müşahidə olunur. Proqnozlara görə, 2026-2031-ci illərdə region üzrə orta illik artım tempi 17,35% olacaq.

Bu inkişafın əsas hərəkətverici qüvvəsi iri dövlət investisiyalarıdır. Səudiyyə Ərəbistanı oyun sənayesinə 37,7 milyard dollar sərmayə yatıracağını açıqlayıb və bununla da sektorun ən böyük investorlarından birinə çevrilib. Dubay isə azad iqtisadi zonalarda təqdim olunan güzəştlər hesabına beynəlxalq studiyaları cəlb edir və yerli tərəfdaşlarla birgə müəssisələrin yaradılmasını təşviq edir.

ABŞ və Avropa oyun sənayesində qabaqcıl texnologiyaların inkişaf etdirildiyi əsas regionlar olaraq qalır. Bulud texnologiyaları, süni intellekt əsaslı alətlər və canlı xidmətlər üçün analitika sistemləri çox vaxt ilk olaraq San-Fransisko, Monreal və Helsinkidə tətbiq edilir, daha sonra isə digər bazarlara yayılır. Bu amil ən müasir texnologiyalarla işləmək istəyən mütəxəssislər üçün regionu xüsusilə cəlbedici edir. Eyni zamanda, məhz burada ixtisaslı kadr çatışmazlığı daha qabarıq hiss olunur. Böyük Britaniyada fəaliyyət göstərən studiyaların yarısı 2024-cü ildə əməkdaş tapmaqda çətinlik çəkdiklərini bildirib. Bu səbəbdən şirkətlər bəzi funksiyaları saat qurşağı baxımından yaxın ölkələrə - Polşa, İspaniya və İrlandiyaya ötürürlər. Həmin ölkələr Avropa oyun şirkətləri üçün əsas yaxın autsorsinq istiqamətlərinə çevrilir.

Afrika və Latın Amerikası hələlik qlobal oyun sənayesində nisbətən kiçik paya malikdir. Buna baxmayaraq, hər iki regionda diqqətçəkən dəyişikliklər müşahidə olunur.

Braziliya bazarı ənənəvi konsol oyunlarından bulud əsaslı oyun xidmətlərinə keçid edir. Bu transformasiya infrastruktur tələblərini dəyişdirir və bulud texnologiyaları üzrə mütəxəssislər üçün yeni imkanlar yaradır.

Nigeriyada isə telekommunikasiya operatorları mobil rabitə vasitəsilə oyunlara çıxışı təmin edən xüsusi tarif paketlərini sınaqdan keçirirlər. Bu model geniş tətbiq olunacağı təqdirdə, qitədə oyunçu auditoriyasının əhəmiyyətli dərəcədə artmasına səbəb ola bilər. Nəticədə yerli oyun hazırlayan və texniki dəstək göstərən komandalar üçün yeni iş imkanları formalaşa bilər.