Ekspert: Yeni ADINT izləmə metodu kibercasusluq sahəsini köklü şəkildə dəyişir

Rəqəmsal izlərin təhlilinə əsaslanan ADINT metodunun ortaya çıxması klassik kibercasusluq anlayışında ciddi dəyişiklik yaradıb. Çünki bu texnologiya cihazları və ya proqram təminatını sındırmadan insanları izləməyə imkan verir. 

Valyuta.az xəbər verir ki, bu barədə Rusiyanın Təhlükəsizlik Xidmətləri üzrə Milli Şurasının texnoloji hüquqpozmalarla mübarizə şurasının sədri və “İnternet-Rozısk” şirkətinin təsisçisi gazeta.ru-ya açıqlamasında bildirib.

Ekspert bu fikirləri “The Cradle” nəşrində dərc olunan və “Starlink” istifadəçilərinin izlənilməsi üçün nəzərdə tutulduğu iddia edilən İsrail mənşəli ADINT xidmətinə dair materialı şərh edərkən səsləndirib.

ADINT insanın davranış vərdişləri barədə məlumatların toplanması və təhlili metodudur. Bu məlumatlar əsasən smartfonlar tərəfindən reklam platformaları üçün yaradılır. Hərçənd həmin məlumatlar anonim şəkildə toplanır, uzunmüddətli və dərin təhlil nəticəsində konkret şəxsin kimliyini müəyyənləşdirmək mümkün olur.

Bu yolla insanın yaşı, cinsi, yaşayış və iş yeri, peşəsi, şəxsi münasibətləri, istifadə etdiyi avtomobil və digər xüsusiyyətləri barədə nəticələr çıxarmaq mümkündür. ADINT texnologiyası məhz bu cür ayrı-ayrı anonim məlumat parçaları arasında əlaqələr quraraq insanların müəyyən edilməsinə və izlənilməsinə yönəlib.

“Biz artıq siqnalın ələ keçirilməsinin əsas məqsəd olduğu köhnə kəşfiyyat modelinin tamamilə aradan qalxdığı dövrü yaşayırıq. İndi diqqət mesajın məzmununa deyil, onun kontekstinə yönəlib: kim, harada, hansı cihazdan, hansı vaxtda və kimin yaxınlığında internetə qoşulub”, deyə ekspert bildirib.

Bedərovun sözlərinə görə, İsrailin “TargetTeam” şirkətinin hazırladığı və 2026-cı ilin mayında Vyanada potensial müştərilər üçün qapalı təqdimatda nümayiş etdirilən “Stargetz” xidməti yeni olsa da, çox güman ki, artıq xüsusi xidmət orqanları tərəfindən praktikada istifadə olunur.

Ekspert hesab edir ki, “Stargetz” əvvəlcədən xüsusi sifariş əsasında hazırlanıb. Onun fikrincə, bu cür sistemlərin yaradılması o qədər bahalıdır ki, onları yalnız təqdimat məqsədilə hazırlamaq iqtisadi baxımdan məqsədəuyğun deyil.

Paşa Məmmədli