İlon Mask Mars planına görə 1 milyard "SpaceX" səhmi qazana bilər

"SpaceX" şirkətinin IPO prospektində yer alan məlumata görə, şirkətin baş direktoru İlon Mask Marsda ən azı 1 milyon nəfərin yaşadığı koloniya yaradılması halında 1 milyard səhm almaq hüququ qazanacaq.

Sənəddə qeyd olunur ki, sözügedən mükafat performansa əsaslanan təşviq proqramının tərkib hissəsidir.

Ayrılması nəzərdə tutulan səhmlərin həcmi şirkətin IPO çərçivəsində satışa çıxarmağı planlaşdırdığı ilkin səhm paketindən təxminən 80 faiz çoxdur.

İlon Mask uzun illərdir Marsın koloniyalaşdırılmasını həm şəxsi məqsədi, həm də "SpaceX"in əsas strateji hədəflərindən biri kimi təqdim edir.

Şirkət 2028-ci ildən etibarən Marsa pilotsuz yük missiyalarının göndərilməsini planlaşdırır.

Həmçinin planetdə ilkin tədqiqat və tikinti işlərinə dəstək vermək üçün "Tesla" şirkətinin "Optimus" robotlarının Marsa göndərilməsi nəzərdə tutulur.

Mütəxəssislər bildirirlər ki, 1 milyon nəfərlik dayanıqlı Mars koloniyasının yaradılması son dərəcə mürəkkəb və uzunmüddətli layihədir. Bu məqsədin nə vaxt və ya ümumiyyətlə həyata keçirilib-keçirilməyəcəyi ilə bağlı qeyri-müəyyənliklər qalmaqdadır.

Prospektdə göstərilən 135 ABŞ dolları səhm qiyməti əsas götürüldükdə, İlon Maskın əldə edə biləcəyi mükafatın dəyəri təxminən 135 milyard ABŞ dollarına bərabər olacaq.

Qeyd edək ki, məlumat "The Motley Fool" nəşrinin "SpaceX"in IPO prospektinə istinadən hazırladığı materialda yer alıb.

Tənzilə Ağabalayeva