"Meta"nın yeni AI bazası Hindistanda qurulur

Texnologiya şirkətləri süni intellekt sistemlərinin təlimi və tətbiqi üçün tələb olunan hesablama gücünü təmin etmək uğrunda yarışdığı bir vaxtda, "Meta" Hindistanda ilk süni intellekt infrastrukturu investisiyasını həyata keçirərək, sürətlə süni intellekt infrastrukturu mərkəzinə çevrilən bazarda "Reliance Industries" ilə məlumat mərkəzi tərəfdaşlığı qurub.

Çərşənbə günü elan olunan tərəfdaşlıq çərçivəsində "Meta" Qucarat ştatının Camnaqar şəhərində yerləşəcək 168 meqavat gücündə süni intellekt dəstəkli məlumat mərkəzi layihəsində "Reliance" ilə əməkdaşlıq edəcək.

Bu addım, "Meta"nın vaxtilə "Reliance"ın "Jio Platforms" şirkətinə milyardlarla dollar sərmayə yatırmasından başlayaraq, ötən il Hindistan və xarici bazarlardakı müştərilər üçün korporativ süni intellekt həllərinin hazırlanmasına yönəlmiş 100 milyon dollarlıq birgə müəssisənin yaradılmasına qədər inkişaf edən əməkdaşlığın növbəti mərhələsidir.

Saziş Hindistanın süni intellekt infrastrukturu investisiyaları üçün cəlbedici istiqamət kimi mövqeyini daha da möhkəmləndirdiyi bir dövrə təsadüf edir. Süni intellekt modellərinin hazırlanması və tətbiqi üçün hesablama gücünə tələbatın sürətlə artması fonunda texnologiya nəhəngləri yeni məlumat mərkəzi regionları axtarırlar. Son dövrlərdə "Microsoft", "Amazon", "Google", "OpenAI" və "Uber" kimi şirkətlər ölkədə süni intellekt və bulud infrastrukturu investisiyalarını açıqlayıblar. Hindistan son illərdə məlumat mərkəzləri şəbəkəsini sürətlə genişləndirib.

Hindistana investisiya axını yalnız qlobal texnologiya şirkətləri ilə məhdudlaşmır. Həftənin əvvəlində "Blackstone" tərəfindən dəstəklənən "AirTrunk" şirkəti 2030-cu ilə qədər ölkədə 5 qiqavat məlumat mərkəzi gücü yaratmaq üçün 30 milyard dollar sərmayə qoyacağını açıqlayıb. Eyni zamanda, "Adani" və "Tata Consultancy Services" kimi Hindistan konqlomeratları da süni intellekt yüklərini dəstəkləmək məqsədilə iri məlumat mərkəzi genişlənmə planlarını təqdim ediblər.

Yeni Dehli hökuməti belə investisiyaları təşviq etmək üçün müxtəlif güzəştlər tətbiq edib. Bunlara xarici bulud xidmətləri təminatçıları üçün, Hindistan məlumat mərkəzlərindən istifadə etməklə xarici bazarlara satılan xidmətlərə görə 2047-ci ilə qədər vergi güzəştləri daxildir.

Hökumət məlumatlarına görə, Hindistanın quraşdırılmış məlumat mərkəzi gücü 2020-ci ildəki təxminən 375 meqavatdan 2025-ci ildə 1,5 qiqavata yüksəlib. Sənaye proqnozlarına əsasən, bulud texnologiyalarının yayılması, süni intellekt yüklərinin artması və yerli məlumat emalına tələbatın yüksəlməsi nəticəsində bu göstərici onilliyin sonuna qədər beş dəfədən çox artaraq 8 qiqavatı keçə bilər.

"Meta" ilə "Reliance" arasındakı yeni razılaşma 2020-ci ildə "Meta"nın "Jio Platforms"a 5,7 milyard dollar sərmayə yatırmasından sonra dərinləşən tərəfdaşlığın növbəti mərhələsi hesab olunur. Şirkətlər o vaxtdan bəri rəqəmsal xidmətlər, korporativ süni intellekt və indi də yeni nəsil süni intellekt sistemlərinin əsasını təşkil edən infrastruktur sahələrində əməkdaşlığı genişləndiriblər.

Tərəfdaşlıq çərçivəsində "Meta" "Reliance"ın Camnaqardakı yeni obyektində güc resursları icarəyə götürəcək. Şirkətlərin bildirdiyinə görə, məlumat mərkəzi bərpa olunan enerji ilə təmin ediləcək və duzsuzlaşdırılmış dəniz suyu vasitəsilə soyudulacaq. "Meta" burada fəaliyyətini dəstəkləmək üçün tələb olunan enerji və su xərclərinin tam ödənilməsini öz üzərinə götürüb.

"Reliance" bildirib ki, 168 meqavat gücündə obyekt iki il ərzində istifadəyə hazır olacaq və gələcəkdə genişləndirilə biləcək. Məlumat mərkəzi həmçinin "Meta"nın qlobal infrastrukturu və süni intellekt hesablama tələblərinə xidmət edəcək, bununla da Hindistanı şirkətin dünya üzrə süni intellekt obyektləri şəbəkəsinə daha sıx inteqrasiya edəcək.

Razılaşmaya əsasən, "Reliance" layihələndirmə və tikintidən başlayaraq bərpa olunan enerji təchizatı, bağlantı xidmətləri və davamlı istismar da daxil olmaqla tam xidmət paketi təqdim edəcək. Bu, konqlomeratın qlobal texnologiya şirkətləri üçün süni intellekt infrastrukturu sahəsində vahid xidmət mərkəzinə çevrilmək niyyətini göstərir.

Ayrıca, "Meta" Hindistanda "CleanMax" və "Fourth Partner Energy" ilə bağladığı müqavilələr çərçivəsində təxminən 1 qiqavat yeni bərpa olunan enerji gücü təmin etdiyini açıqlayıb. Bu enerji Camnaqar obyektinin enerji təminatını tamamlayacaq.

Şirkətlər sazişin maliyyə dəyərini, obyektdə hansı növ süni intellekt yüklərinin işlədiləcəyini və ya "Meta"nın Hindistanda əlavə süni intellekt infrastrukturu investisiyaları planlaşdırıb-planlaşdırmadığını açıqlamayıblar.

Tənzilə Ağabalayeva