AMD-dən 2 milyard funt-sterlinqlik investisiya qərarı

AMD London Texnologiya Həftəsində Birləşmiş Krallığın süni intellekt ekosistemini və elmi tədqiqatlarını dəstəkləmək məqsədilə 5 illik investisiya planını açıqlayıb.

Valyuta.az xəbər verir ki, AMD İdarə Heyətinin sədri və baş icraçı direktoru doktor Liza Su Birləşmiş Krallığa səfərinə London Texnologiya Həftəsi çərçivəsində keçirilən tədbirlərlə başlayıb. Səfərin əsas məqsədi ölkənin süni intellekt və texnologiya ekosisteminə yönəlmiş yüksək səviyyəli maraqlı tərəf görüşləri kimi təqdim olunur.

Doktor Liza Su Londra Texnologiya Həftəsində etdiyi çıxışda Birləşmiş Krallığın süni intellekt ekosistemini gücləndirməyi hədəfləyən yeni addımları açıqlayıb. Bu çərçivədə elmi kəşflər və dövlət sektorunda innovasiyanın əsasını təşkil edən yüksək səviyyəli hesablama texnologiyalarına çıxışın genişləndirilməsi məqsədilə bir sıra investisiya və strateji əməkdaşlıqlar elan edilib. Planlaşdırılan təşəbbüslər Birləşmiş Krallığın Süni İntellekt Fürsətləri Fəaliyyət Planı və Süni İntellekt Aparat Strategiyası ilə uyğunluq təşkil edir. Addımlar həmçinin dünya səviyyəli süni intellekt infrastrukturu qurulması, texniki bacarıqların inkişafı və süni intellekt istifadəsinin genişləndirilməsi kimi milli prioritetlərə töhfə verir.

Texnologiya nəhəngi AMD Birləşmiş Krallıq üzrə yüksək performanslı hesablama, elmi tədqiqat və işçi qüvvəsinin inkişafını dəstəkləmək üçün beş il ərzində 2 milyard funt-sterlinqə qədər investisiya ayıracağını öhdəsinə götürüb. Bu maliyyə planına əlavə olaraq AMD və “Dell Technologies”, Kembric Universitetinin “Zenith” süni intellekt superkompüterini və “Sunrise” füzyon süni intellekt sistemini dəstəkləmək qərarı verib. Bu əməkdaşlıq ölkənin suveren süni intellekt infrastrukturunun genişləndirilməsinə töhfə verməyi hədəfləyir. Prosesdə “AMD Instinct” GPU-ları, “AMD EPYC” CPU-ları və “AMD ROCm” açıq proqram təminatı aktiv rol oynayacaq. Bu texnologiyalar elmi tədqiqat, səhiyyə, dövlət sektoru innovasiyası və süni intellekt əsaslı kəşf layihələrini dəstəkləyəcək.

Şirkət həmçinin İmperial Kollec London ilə hesablama texnologiyalarının inkişafı istiqamətində əməkdaşlığa başladığını açıqlayıb. Səhiyyə texnologiyaları və iqlim modelləşdirməsi kimi böyük resurs tələb edən tədqiqatlar bu çərçivədə maliyyələşdiriləcək. Tərəflər AMD platformaları və “AMD ROCm” açıq proqram təminatı üzərində süni intellekt modellərinin, elmi iş axınlarının və böyük verilənlərə əsaslanan tətbiqlərin optimallaşdırılması imkanlarını dəyərləndirməyi planlaşdırır.

Digər tərəfdən Birləşmiş Krallığın Qabaqcıl Tədqiqat və İxtira Agentliyi (“ARIA”) tərəfindən həyata keçirilən “Scaling Inference Lab” təşəbbüsünə dəstək məqsədilə “Oriole Networks” ilə əməkdaşlıq qurulub. Süni intellekt infrastrukturunda əsas maneələri aradan qaldırmağı hədəfləyən bu layihədə “Oriole” şirkətinin PRISM fotonik şəbəkə arxitekturası AMD avadanlıqları ilə birləşdiriləcək. Çıxarış iş yüklərinin miqyaslandırılması üzrə yeni yanaşmaların sınaqdan keçirildiyi bu əməkdaşlıq gecikmələrin azaldılması və performansın artırılmasını hədəfləyir. Təşəbbüs tamamilə fotonik şəbəkə ilə dəstəklənən ilk iri miqyaslı süni intellekt sisteminin yaradılmasına zəmin yaradır.

Səfər zamanı çıxış edən doktor Liza Su Birləşmiş Krallığın süni intellekt sahəsində güclü elmi potensiala və inkişaf etmiş tədqiqat infrastrukturuna sahib olduğunu bildirib. O qeyd edib ki, suveren süni intellektin inkişafı, elmi kəşflərin sürətləndirilməsi və uzunmüddətli iqtisadi artımın dəstəklənməsi üçün dövlət, akademiya və sənaye tərəfdaşları ilə əməkdaşlıq davam etdiriləcək.

Paşa Məmmədli