"Samsung" 13 səhv parol cəhdindən sonra smartfonları bloklayacaq

"Samsung" şirkəti One UI 9.0 interfeysində ekran kilidinin PIN-kodu, parolu və ya qrafik açarının səhv daxil edilməsi cəhdlərinin sayına daha sərt məhdudiyyətlər tətbiq edəcəyini açıqlayıb. 

Valyuta.az xəbər verir ki, şirkət yeniliklər barədə rəsmi saytında məlumat yayıb.

Yeni qaydalara əsasən, parolun beş dəfə uğursuz daxil edilməsindən sonra smartfon növbəti cəhdə qədər gözləmə müddətini avtomatik artırmağa başlayacaq. Bloklama müddəti mərhələli şəkildə artacaq: bir dəqiqədən 24 saata qədər.

Ardıcıl 13-cü səhv cəhddən sonra cihaz tamamilə bloklanacaq. Girişi bərpa etmək üçün yalnız smartfonu zavod parametrlərinə sıfırlamaq mümkün olacaq. Bu isə öz növbəsində cihazın yaddaşındakı bütün məlumatların silinməsinə səbəb olacaq.

Təsadüfi bloklanma ehtimalını azaltmaq üçün "Samsung" "ağıllı hesablama" mexanizmi tətbiq edəcək. Əgər istifadəçi eyni səhv PIN-kodu, parolu və ya qrafik açarını iki dəfə ardıcıl daxil edərsə, sistem bunu bir səhv kimi hesablayacaq.

Bundan əlavə, limitə yaxınlaşdıqca smartfon sahibini qalan cəhdlərin sayı barədə xəbərdar edəcək.

Yeni qaydalar biometrik identifikasiyadan istifadə edən cihazlara da şamil olunacaq. Barmaq izi və ya üz tanıma ilə kilidi açmaq mümkün olsa da, "Android" tələblərinə əsasən, əsas parol, PIN-kod və ya qrafik açar ən azı 72 saatdan bir və ya cihaz ilk dəfə işə salındıqda mütləq daxil edilməlidir.

"Samsung" həmçinin bildirib ki, istifadəçi kilid açma kodunu itirdiyi halda şirkət cihaza girişi bərpa edə bilməyəcək. Smartfonu yenidən işlək vəziyyətə qaytarmağın yeganə yolu tam zavod sıfırlaması olacaq.

Bundan sonra istifadəçi əvvəllər cihaza bağlanmış "Samsung" və "Google" hesabları vasitəsilə yenidən autentifikasiyadan keçməli olacaq.

Paşa Məmmədli