Rəhbərinizin gözləri sizdədirsə, ürəyiniz işdə olmayacaq

İş mühitində müdir-işçi münasibətləri əməkdaşların motivasiyası və ümumi iş keyfiyyəti baxımından mühüm rol oynayır. Bu münasibətlərin düzgün qurulması üçün həm işçilər, həm də rəhbərlik tərəfindən müxtəlif idarəetmə addımları atılır. Bu addımlardan biri də rəhbərlərin əməkdaşların iş prosesini mütəmadi yoxlamasıdır. Bəs rəhbərin işçiləri tez-tez nəzarətdə saxlaması həqiqətən işin keyfiyyətini artırırmı?

Əmək qanunvericiliyi üzrə ekspert Nüsrət Xəlilov Valyuta.az-a bildirib ki, bu məsələ birbaşa qanunvericiliklə tənzimlənmir: “Qeyd olunan məsələ əmək qanunvericiliyində konkret şəkildə nəzərdə tutulmayıb. Bu, əsasən işəgötürənin daxili qaydaları və idarəetmə yanaşması ilə müəyyənləşdirilən məsələdir. Əlbəttə ki, nəzarət mexanizmi olmalıdır, lakin rəhbərin əməkdaşların işini daima yoxlaması düzgün yanaşma deyil”.

Ekspertin sözlərinə görə, davamlı nəzarət işçilərdə psixoloji narahatlıq yaradır, qarşılıqlı etimadı zəiflədir və nəticə etibarilə əmək məhsuldarlığının azalmasına səbəb olur: “Əməkdaş bilməlidir ki, ona etibar edilir. Daim yoxlanıldığını hiss edən işçi daha çox stress altında işləyir və bu da səmərəliliyə mənfi təsir göstərir”.

N.Xəlilov vurğulayıb ki, düzgün iş prosesi səlahiyyət bölgüsünə əsaslanmalıdır. Onun sözlərinə görə, xüsusilə kiçik müəssisələrdə bu bölgünün aparılmaması ciddi idarəetmə problemləri yaradır: “Bəzən elə olur ki, bütün qərarlar birbaşa şirkət rəhbəri tərəfindən verilir. Menecerlər olsa belə, onların qərarvermə səlahiyyəti olmur. Rəhbər isə həm qərar verir, həm də bütün işləri özü yoxlayır”.

Ekspert hesab edir ki, bu cür idarəetmə modeli həm rəhbərlik-işçi münasibətlərində gərginlik yaradır, həm də uzunmüddətli perspektivdə şirkət üçün risklər formalaşdırır: “Nəticədə əməkdaşlarda rəhbərliyə qarşı xoş olmayan münasibət formalaşır, iş prosesində səmərəlilik azalır və bu da kadr axınına, işçilərin şirkətdən uzaqlaşmasına gətirib çıxarır”.

Sərvanə Rəmixanova