Tramp Harvard Universitetindən 1 milyard dollar təzminat tələb edir

ABŞ Prezidenti Donald Tramp "Harvard University" ilə davam edən qarşıdurma çərçivəsində universitetdən 1 milyard dollar təzminat tələb edəcəyini açıqlayıb.

Valyuta.az xəbər verir ki, Tramp bu barədə "Truth Social" platformasında paylaşım edərək, Harvardı "New York Times" qəzetinə “əsassız məlumatlar ötürməkdə” ittiham edib. Ağ Ev isə Harvardı ABŞ universitetlərində keçirilən fələstin tərəfdarı etirazlar zamanı antisemitizmə qarşı yetərli addımlar atmamaqda günahlandırır. Universitet ittihamları rədd edir.

Qeyd edək ki, Tramp administrasiyası daha əvvəl Harvard üçün nəzərdə tutulan təxminən 2 milyard dollarlıq federal tədqiqat maliyyəsini dondurmuşdu. Universitet bu qərara etiraz edərək məhkəməyə müraciət edib və federal məhkəmə maliyyə kəsintisini ləğv edib.

Donald Tramp paylaşımında bildirib ki, administrasiya gələcəkdə Harvard Universiteti ilə heç bir əməkdaşlıq niyyətində deyil. Tramp universiteti qanun pozuntularında ittiham etsə də, konkret detalları açıqlamayıb.