AMB: Ötən il nağd xarici valyutanın alışı satışını 423 milyon dollar üstələyib

Azərbaycanın valyuta bazarında stabillik qiymət sabitliyinin qorunmasında əsas amillərdən biri kimi çıxış edir. 2025-ci ildə mübadilə şöbələri tərəfindən nağd xarici valyutanın alışı satışını 423 milyon ABŞ dolları üstələyib.

Valyuta.az Mərkəzi Banka istinadən xəbər verir ki, rezident fiziki şəxslərin əmanətlərinin dollarlaşma səviyyəsinin 2.6 faiz bəndi azalaraq 28%-ə enməsi məzənnə ilə bağlı gözləntilərin nikbin olduğunu göstərir.

Mövcud şəraitdə Azərbaycan Mərkəzi Bankının valyuta ehtiyatları 2025-ci ildə 5.1% artaraq 11.5 milyard ABŞ dollarına çatıb.

Valyuta bazarında tarazlığın formalaşmasında xarici sektor göstəriciləri də mühüm rol oynayıb. Gömrük statistikasına əsasən, 2025-ci ildə ölkənin xarici ticarətində 0.7 milyard ABŞ dolları məbləğində müsbət saldo qeydə alınıb. İlkin qiymətləndirmələrə görə, qızıl idxalı çıxılmaqla bu göstərici 6.9 milyard dolları üstələyib.

Mərkəzi Bankın yenilənmiş makroiqtisadi proqnozlarına əsasən, 2026 və 2027-ci illərin sonuna cari əməliyyatlar hesabının profisitli olacağı gözlənilir.