Azərbaycanlının Britaniyadakı startapı 25 milyon dollar investisiya aldı

Böyük Britaniyada fəaliyyət göstərən proptech platforması “OneDome” biznes genişlənməsini sürətləndirmək məqsədilə 25 milyon dollarlıq yeni maliyyə vəsaiti cəlb edib.

Valyuta.az xəbər verir ki, platforma maliyyə və daşınmaz əmlak texnologiyalarını birləşdirərək ev alqı-satqısı prosesinin müxtəlif mərhələlərini bir ekosistemə inteqrasiya edir.

Məlumatına görə, pre-Seriya C mərhələsində baş tutan bu investisiya raundunun ardından şirkətin indiyədək cəlb etdiyi ümumi vəsaitin həcmi 40 milyon dollara çatacaq.

Son investisiya raunduna “Channel 4” telekanalı ilə media qarşılığında pay (media-for-equity) əsasında əldə olunmuş, dəyəri 7,5 milyon funt sterlinqədək qiymətləndirilən razılaşma da daxildir. Bu barədə ilkin məlumat ötən ilin sonunda yayılmışdı.

"OneDome”un “HomeBuyer” adlı xidməti ipoteka məsləhəti, hüquqi daşınmaz əmlak əməliyyatları (conveyancing) və proseslərin idarə olunmasını bir paketdə təqdim edir. Xidmət sabit qiymətlə - 999 funt sterlinq - təklif olunur.

2023-cü ildə platforma onlayn ipoteka brokeri “Trussle”u satın alıb. Həmin şirkətin investorları arasında “Goldman Sachs” da yer alıb.

“OneDome”un İdarə Heyətinə keçmiş şəhər hüquqşünası Ser Naycel Noulz (Sir Nigel Knowles) sədrlik edir. Şirkət qarşıdakı beş il ərzində Böyük Britaniyada həyata keçirilən bütün ev alqı-satqısı əməliyyatlarının 10 faizində iştirak etməyi hədəfləyir.

Mənfəətlə fəaliyyət göstərdiyini bildirən platforma 2026-cı ilin sonunadək gəlirlərini üç dəfə artırmağı planlaşdırır. Hazırda “OneDome” hər ay təxminən 1,4 milyard dollar həcmində ipoteka kreditinin rəsmiləşdirilməsini təmin edir və 500-dən çox ipoteka brokerindən ibarət şəbəkə ilə əməkdaşlıq edir. Bu göstəricilər platformanı ölkənin aparıcı ipoteka və daşınmaz əmlak texnologiyası şirkətlərindən birinə çevirir.

“İnsanların üzləşdiyi maliyyə əməliyyatları arasında ev almaq hələ də ən stresli və pərakəndə proseslərdən biridir”, - deyə “OneDome”un təsisçisi və baş icraçı direktoru Babək İsmayıl bildirib.

Onun sözlərinə görə, bu maliyyə vəsaiti platformanı genişləndirməyə və Böyük Britaniyada ev alqı-satqısı və maliyyələşdirmə yanaşmalarını yenidən formalaşdırmağa imkan verəcək.

Şirkət investisiya raundunda iştirak edən digər investorların adlarını açıqlamayıb.