Əmlak sığortasında ödənişlər 8 milyonu keçdi

2025-ci ilin yanvar-dekabr aylarında əmlak sığortası üzrə sığorta haqlarında 7 milyon 371 min manat və ya 3,15%, sığorta ödənişlərində isə 8 milyon 550 min manat və ya 22,54% artım qeydə alınıb.

Valyuta.az xəbər verir ki, sözügedən dövrdə əmlak sığortası üzrə toplanan sığorta haqları 240 milyon 878 min manat təşkil edib. Halbuki, 2024-cü ilin eyni dövründə bu göstərici 233 milyon 507 min manat olub.

Sığorta ödənişlərinə gəldikdə isə, 2025-ci ilin 12 ayında əmlak sığortası üzrə 46 milyon 474 min manat ödəniş həyata keçirilib. 2024-cü ilin müvafiq dövründə isə bu məbləğ 37 milyon 924 min manat təşkil edib.

Qeyd edək ki, əmlak sığortası növləri arasında ən yüksək yığım əmlakın yanğından və digər risklərdən sığortası üzrə müşahidə olunub. Bu istiqamətdə yığımlar 85 milyon 525 min manat, sığorta ödənişləri isə 4 milyon 10 min manat səviyyəsində qeydə alınıb.

Sərvanə Rəmixanova