Avstraliya Çinin monopoliyasını sarsıtmaq istəyir - İlk addım atıldı

Avstraliya nadir torpaq metalları da daxil olmaqla kritik əhəmiyyətli faydalı qazıntılar üçün minimum qiymətin müəyyən edilməsi imkanını nəzərdən keçirir. Ölkə bazarda Çinin dominant mövqeyini məhdudlaşdırmaq və yeni mədənlərə, həmçinin emal layihələrinə xarici investisiyalar cəlb etmək niyyətindədir.

Valyuta.az “Bloomberg”ə istinadən xəbər verir ki, qərarın elan edilməsi artıq yerli istehsalçıların səhmlərinin bahalaşmasına səbəb olub.

Avstraliya nadir torpaq metalları üzrə dünyada dördüncü ən böyük ehtiyatlara sahibdir. Bu kritik əhəmiyyətli minerallar müdafiə sənayesindən tutmuş texnoloji şirkətlərə qədər bütün sahələrdə istifadə olunur.

Bununla belə, Avstraliya kritik elementlərin hasilatı və emalı sahəsində Çindən xeyli geri qalır və onu yaxalamaq üçün ciddi səylər göstərməlidir. Eyni zamanda, ölkənin resurs sektoru tarixən xarici investisiyalardan asılı olub.

Pekin faktiki olaraq kritik əhəmiyyətli mineralların emalı bazarında monopolist mövqeyə malikdir və daha əvvəl ticarət mübahisələri zamanı tədarükü təsir vasitəsi kimi istifadə edib.

Avstraliya 843 milyon dollar dəyərində kritik faydalı qazıntılar ehtiyatı yaratmağı planlaşdırır. İlkin mərhələdə hökumət nadir torpaq elementlərinin, stibiumun və qalliumun alınmasına diqqət yetirəcək. Bu səylər Avstraliyanın 2025-ci ildə ABŞ ilə imzaladığı və Amerikanın Avstraliyanın kritik elementlərinə çıxışını genişləndirən tarixi sazişlə müşayiət olunur.

Paşa Məmmədli