Səhmlər 5 min manatdan başlayan qiymətlə satışa çıxarılır

10 mart tarixində keçiriləcək təkrar pul hərracında beş səhmdar cəmiyyətinin səhmləri satışa çıxarılacaq. Hərracda iştirak edəcək cəmiyyətlərdən biri “Salyan Broyler” ASC-dir. 

Valyuta.az xəbər verir ki, cəmiyyət tərəfindən buraxılmış 560 min 59 səhm arasından 168 min 225 ədədi satışa çıxarılacaq.

Bu, ümumi səhmlərin təxminən 30%-ni təşkil edir. Həmin səhmlərin nominal dəyəri 336 min 450 manat, ilkin satış qiyməti isə 168 min 225 manat müəyyən edilib. 

Səhmi hərraca çıxarılacaq digər bir cəmiyyət “Yevlax Yük Avtonəqliyyat” ASC-dir. Ümumi 158 min 443 səhm buraxılmışdır və onlardan 47 min 543 ədədi, yəni 30%-ə yaxını satışa təqdim olunur. Bu səhmlərin nominal dəyəri 95 min 86 manat, ilkin satış qiyməti isə 47 min 543 manatdır.

“Yevlax Kəndnəqliyyat"ın satışa 33 min 906 səhm çıxarılacaq. Səhmlərin nominal dəyəri 67 min 812 manat, ilkin satış qiyməti isə 33 min 906 manatdır. Masallı rayonunun Şıxlar kəndində fəaliyyət göstərən “Şıxlar Broyler” ASC də hərracda iştirak edəcək. Ümumi 139 min 804 səhm buraxılıb və bunun 42 min 90 ədədi satışa çıxarılır. Bu səhmlərin nominal dəyəri 84 min 180 manat, ilkin satış qiyməti 42 min 90 manatdır. 

Son olaraq, “Ucar İnşaat Xidmət” ASC-nin də səhmləri hərraca təqdim olunacaq. Ümumi 12 min 838 səhm buraxılıb və onlardan 5 min 784 ədədi (yəni 45%-dən çoxu) satışa çıxarılır. Səhmlərin nominal dəyəri 11 min 568 manat, ilkin satış qiyməti 5 min 784 manatdır.

Mayya Hüseynova