Patent almadan ixtirasını dünyaya təqdim edən mühəndis

1959-cu ildə “Volvo” şirkətinin mühəndisi Nils Bohlin tərəfindən icad edilən üç nöqtəli təhlükəsizlik kəməri avtomobil təhlükəsizliyi tarixində inqilabi yenilik hesab olunur. Bu sistem sürücü və sərnişi həm çiyin, həm də bud nahiyəsindən sabitləyərək qəza zamanı bədənin avtomobil daxilində hərəkətini minimuma endirir və ölüm riskini əhəmiyyətli dərəcədə azaldır.

Valyuta.az xəbər verir ki, bu təhlükəsizlik kəməri ilk dəfə həmin il “Volvo PV544” və “Volvo Amazon” modellərində tətbiq olunub.

Lakin “Volvo” bu texnologiyanı kommersiya məqsədilə istifadə etməyib. Əksinə, şirkət patenti bütün avtomobil sənayesi üçün açıq elan edərək ondan heç bir ödəniş və ya lisenziya tələbi olmadan istifadə edilməsinə icazə verib.

“Volvo” bu addımı ilə təhlükəsizliyi kommersiya maraqlarından üstün tutdu və nəticədə üç nöqtəli təhlükəsizlik kəməri qısa müddətdə qlobal standartlara çevrildi.

Aparılan tədqiqatlara əsasən, “Volvo”nun bu sosial məsuliyyət yanaşması sayəsində sözügedən ixtira indiyədək 1 milyondan çox insanın həyatını xilas edib. İxtiranın müəllifi Nils Bohlin bundan əvvəl aviasiya təhlükəsizliyi sahəsində çalışıb və təyyarələrdə istifadə edilən katapult sistemləri üzrə ixtisaslaşıb. Məhz bu təcrübə onun avtomobillər üçün daha effektiv təhlükəsizlik mexanizmi hazırlamasına imkan verib.

Başlanğıcda bəzi istifadəçilər bu kəməri qəribə və istifadəsi çətin hesab etsələr də, aparılan sınaqlar göstərib ki, əvvəlki iki nöqtəli - yalnız bel nahiyəsini əhatə edən - kəmərlərlə müqayisədə yeni sistem daha yüksək qoruma təmin edir.

Hazırda “Volvo” bu mirası davam etdirərək sensor əsaslı, adaptiv təhlükəsizlik kəmərləri üzərində də çalışır. Yeni nəsil bu sistemlər sərnişinin bədən quruluşuna və oturuş vəziyyətinə uyğun olaraq gərginlik səviyyəsini avtomatik tənzimləyə bilir.

Mayya Hüseynova