"Meta" 1,4 trilyon dollarlıq cərimə tələbi ilə üz-üzə qalıb

ABŞ-də "Meta" şirkəti uşaq və yeniyetmələrin sosial media təhlükəsizliyi ilə bağlı məhkəmə işində 1,4 trilyon dollar məbləğində cərimə tələbi ilə üzləşib.

Valyuta.az xəbər verir ki, şirkətin məhkəməyə təqdim etdiyi sənədlərə əsasən, Kaliforniya, Kolorado, Kentukki və Nyu-Cersi ştatları "Meta"nı "Facebook" və "Instagram" platformalarını gənc istifadəçiləri daha uzun müddət platformada saxlamaq və asılılıq yaratmaq məqsədilə hazırlamaqda ittiham edir. İddiada həmçinin şirkətin platformaların təhlükəsizliyi ilə bağlı ictimaiyyəti yanlış məlumatlandırdığı bildirilir.

Avqust ayında baxılacaq məhkəmə prosesi ərəfəsində irəli sürülən 1,4 trilyon dollarlıq cərimə tələbi diqqət çəkir. Çünki bu məbləğ "Meta"nın təxminən 1,5 trilyon dollar həcmində olan bazar dəyərinə yaxındır. Bununla belə, söhbət təsdiqlənmiş cərimədən deyil, ştatların məhkəmədə qalib gələcəyi təqdirdə tətbiq olunmasını istədiyi sanksiyadan gedir.

"Meta" isə irəli sürülən ittihamları rədd edir. Şirkət hesab edir ki, tələb olunan cərimə məbləği kifayət qədər sübutlarla əsaslandırılmayıb və bu həcmdə sanksiyanın istehlakçı hüquqlarının müdafiəsi ilə bağlı məhkəmə işlərində analoqu yoxdur.

Məhkəmədə əsas müzakirə mövzusu "Facebook" və "Instagram"dakı bəzi funksiyaların uşaq və yeniyetmələri platformalarda daha çox vaxt keçirməyə sövq edəcək şəkildə hazırlanıb-hazırlanmaması olacaq. Bundan əlavə, məhkəmə şirkətin platformalarının təhlükəsizliyi barədə istifadəçiləri yanlış istiqamətləndirib-istiqamətləndirmədiyini də araşdıracaq.

Qeyd edək ki, uşaqların onlayn təhlükəsizliyi ilə bağlı oxşar ittihamlarla üzləşən yeganə texnologiya şirkəti "Meta" deyil. "Snapchat"ın sahibi Snap, "YouTube"un sahibi Alphabet və "TikTok"un sahibi ByteDance də analoji iddialarla qarşılaşıb.

Sərvanə Rəmixanova